رووداو دیجیتاڵ
پشکی رۆژانەی بەنزینی کەرکووک بە بڕی 170 هەزار لیتر زیاد کرا و گەیشتە 1 ملیۆن و 920 هەزار لیتر. بەڕێوەبەری دابەشکردنی بەرهەمە نەوتییەکانی پارێزگاکە دەڵێت، هێشتا ئەو بڕە پشکی راستەقینەی کەرکووک نییە.
عەلی رەبیع، بەڕێوەبەری لقی کەرکووکی کۆمپانیای دابەشکردنی بەرهەمە نەوتییەکانی عێراق، ئەمڕۆ شەممە 15-08-2026 بە تۆڕی میدیایی رووداوی راگەیاند، "دوای پەیوەندی و ناردنی چەند نووسراوێکی فەرمی بۆ وەزیری نەوتی عێراق، توانرا پشکی رۆژانەی بەنزینی کەرکووک لە 1 ملیۆن و 750 هەزار لیترەوە بۆ 1 ملیۆن و 920 هەزار لیتر زیاد بکرێ."
بە گوتەی عەلی رەبیع، ئەم زیادکردنە وادەکات رۆژانە 5 تانکەر بەنزینی زیاتر بگاتە وێستگەکانی دابەشکردنی سووتەمەنی لە پارێزگاکە و هەربۆیەش پێنج وێستگەی دابەشکردنی بەنزین زیاد کراوە.
بەڕێوەبەری دابەشکردنی بەرهەمە نەوتییەکانی کەرکووک روونیکردەوە کە ئەم بڕە "زیادکردن" نییە، بەڵکو گەڕانەوەیە بۆ ئەو پشکەی پێشتر کەرکووک وەریدەگرت و بەهۆی دۆخی ئەمنیی ناوچەکەوە کەمکرابووەوە؛ گوتیشی، "مافی راستەقینەی کەرکووک زۆر لەم بڕە زیاترە و پێویستە پشکی رۆژانە بگاتە 2 ملیۆن و 200 هەزار لیتر."
سەبارەت بە چارەسەری قەیرانی بەنزین، عەلی رەبیع پێیوایە هێشتا ئەم بڕە بە تەواوی کۆتایی بە کێشەکە ناهێنێت و رایگەیاند، "قەیرانی بەنزین تەنیا ئەو کاتە بە یەکجاری کۆتایی دێ کە نرخەکەی لەنێوان کەرکووک و پارێزگاکانی دەوروبەریدا یەکبخرێت."
.jpg&w=3840&q=75)
