رووداو دیجیتاڵ
فێستیڤاڵی بەرهەمە خۆماڵی و کولتوورییەکانی خورماڵ لە ناوچەی هەورامان، دوای سێ رۆژ لە نمایشکردنی بەرهەمە جۆراوجۆرەکان درەنگانی دوێنێ شەو کۆتایی هات. لێپرسراوی تۆڕی رێکخراوەکانی خورماڵ دەڵێت، کە داهاتی فێستیڤاڵەکە 300 ملیۆن دینار بووە و نزیکەی 70 هەزار گەشتیار سەردانیان کردووە.
رۆژی یەکشەممە، 16ـی ئابی 2026، بابا سەنعان فایەق، لێپرسراوی تۆڕی رێکخراوەکانی خورماڵ لەبارەی ئەنجام و چۆنیەتی بەڕێوەچوونی چالاکییەکان بە تۆڕی میدیایی رووداوی راگەیاند: "فێستیڤاڵی بەرهەمە خۆماڵییەکان لە هەورامان زۆر با باشی بەڕێوەچوو، هیچ کێشە و گرفتێکیش رووینەداوە".
بە گوتەی بابا سەنعان فایەق، جگە لە بەرهەمی خۆماڵی و کاری دەستی، خواردن و خواردنەوەش فرۆشراون. گوتیشی: "داهاتی بەرهەمەکانی ئەم فێستیڤاڵە 300 ملیۆن بوو بە هەموو بەرهەمەکانەوە".
بەپێی ئەو ئامارانەی کە لێپرسراوی تۆڕی رێکخراوەکانی خورماڵ خستیەڕوو، فێستیڤاڵەکە پێشوازییەکی زۆری لێکراوە و گوتی: "نزیک بە 70 هەزار گەشتیار هاتبوون."
هەنجیری هەورامان و خورماڵ یەکێکە لە بەنێوبانگترین جۆری هەنجیر لە کوردستان و خواستی زۆری لەسەرە. بابا سەنعان فایەق گوتی: "لە فێستیڤاڵەکەدا هەنجیری زۆر نەفرۆشرا، چونکە ئەم ساڵ بەهۆی نەخۆشییەوە هەنجیرمان بەراورد بە ساڵەکانی دیکە کەمی کردووە، لە پێگەیشتنیش دواکەوتووە".
فێستیڤاڵی بەرهەمی خۆماڵی و کولتوورییەکان بۆ یەکەمین ساڵ لە هەورامان سازکرا. کە سێ رۆژ لە 13 تاوەکو 15ـی ئابی 2026، بەڕێوەچوو.
بەپێی ئامارە فەرمییەکان، بە گشتی لە سنووری هەڵەبجە 175 دۆنم باخی هەنجیر هەیە، ساڵانە هەر دۆنمێک یەک و نیو تاوەکو دوو تۆن بەرهەمی دەبێت، کە دەکاتە نزیکەی 350 بۆ 400 تۆن.
