رووداو دیجیتاڵ
سەرۆکی رێکخراوی یەکێتیی پیاوانی کوردستان دەڵێت، تووندووتیژیی دژی پیاوان بەراورد بە پار زیادی کردووە، لەم ساڵدا 439 تووندوتیژی دژی پیاوان تۆمارکراوە.
بورهان فەرەج، ئەمڕۆ هەینی، 4ـی ئەیلوولی 2026 بە تۆڕی میدیایی رووداوی راگەیاند: لە مانگی یەکی ئەم ساڵەوە لە سەرجەم لقەکانمان لە هەرێمی کوردستان 439 سکاڵا و تووندوتیژیی دژی پیاوان تۆمارکراوە و 44 پیاو خۆیان کوشتووە و 17 پیاویش کوژراون.
سەرۆکی رێکخراوی یەکێتیی پیاوانی کوردستان گوتی، ئامارەکان بەراورد بە پار روو لە زیادبوونە، پار تاوەکو ئەم کاتانە 427 سکاڵا و تووندوتیژیی دژی پیاوان تۆمارکرابوو، بەڵام ئەم ساڵ ژمارەکان بەرزبوونەتەوە و بەردەوامیش سکاڵای نوێ تۆمار دەکرێت.
لەبارەی هۆکارەکانی تووندوتیژیی دژی پیاوان، بورهان فەرەج ئاماژەی بەوە کرد، "بە گوێرەی بەدواداچوونەکانمان پاڵنەری سەرەکی بۆ زیادبوونی تووندوتیژیی دژی پیاوان، قەیرانی دارایی و ناسەقامگیریی سیاسییە لە هەرێمی کوردستان، هاوکات بەشێکی دیکەی هۆکارەکان دەگەڕێتەوە بۆ بەکارهێنانی تۆڕە کۆمەڵایەتییەکان."
