رووداو دیجیتاڵ
کەشناسیی هەرێمی کوردستان دەڵێ، سبەی بەراورد بە دوێنێ، پلەی گەرما نزیکەی پێنج پلەی سیلیزی دادەبەزێ. کەشناسێک پێشبینی دەکات، ئەمڕۆ و سبەی "بارانی کەم" لە ناوچە شاخاوییەکان ببارێ.
کەشناسیی هەرێمی کوردستان بڵاویکردەوە، ئەمڕۆ ئاسمان ساماڵ و پەڵەهەور دەبێت، هاوکات تۆز و خۆڵێکی "سووک"یش لە کەشدا بەدی دەکرێ.
کەشناسی رایگەیاندووە، ئەمڕۆ بەراورد بە دوێنێ پلەی گەرما یەک بۆ دوو پلە دادەبەزێ و سبەی بەراورد بە ئەمڕۆ دوو بۆ سێ پلەی دیکە دادەبەزێ.
سالار حاجی عەلی، شارەزای کەشناسی، ئەمڕۆ دووشەممە بە تۆڕی میدیایی رووداوی گوت: "پێشبینی دەکرێ لەمڕۆوە شەپۆلێکی ناسەقامگیریی کەشوهەوا و بارانبارینی لاواز بەشێک لە ناوچە شاخاوییەکان و کوێستانەکان بگرێتەوە، کە بەهۆی هاتنی بارستەهەوایەکی شێدارەوەیە لە دەریای نێوەڕاست و کەنداوی عەرەبی".
ئەو کەشناسە گوتی: "نزیکبوونەوەی وەرزی پاییز گۆڕان لە کەشدا دروست دەکات و شتێکی سرووشتییە کە بارانێکی کەم لە ناوچە شاخاوییەکان ببارێ. شەپۆلەکە لاوازە و سەنتەری شارەکان ناگرێتەوە."
پلەی گەرمای سبەی بەگوێرەی کەشناسی هەرێمی کوردستان بەم شێوەیەیە:
هەولێر: 38 پلەی سیلیزی
سلێمانی: 36 پلەی سیلیزی
دهۆک: 37 پلەی سیلیزی
هەڵەبجە:38 پلەی سیلیزی
پیرمام: 35 پلەی سیلیزی
چەمچەماڵ: 37 پلەی سیلیزی
زاخۆ: 37 پلەی سیلیزی
ئاکرێ: 37 پلەی سیلیزی
گەرمیان: 40 پلەی سیلیزی
حاجی ئۆمەران:27 پلەی سیلیزی
