رووداو دیجیتاڵ
بەڕێوەبەرایەتیی هاتووچۆی کۆیە دەڵێ، رووداوێکی "سەخت"ی هاتووچۆ لە رێگەی کۆیە - سماقووڵی روویداوە و گیانلەدەستدان و برینداری لێکەوتوەتەوە.
رووداوەکە ئەمڕۆ سێشەممە لە نێوان بارهەڵگرێک و تەکسییەک لە نزیک سێڕیانی جەلی روویداو هاتووچۆ رایگەیاندووە: "کەسێک گیانی لەدەست داوە و دوو کەسی دیکەش بریندارن."
هاوکار عەلی، گوتەبێژی تەندروستیی کۆیە بە تۆڕی میدیایی رووداوی گوت: "ئەو کەسەی گیانی لەدەست داوە ئافرەتێکە، هەروەها یەکێک لە بریندارەکان هێنراوەتە نەخۆشخانە، دۆخی تەندروستیی باشە."
بە گوێرەی بەدواداچوونی رووداو، لە یەک هەفتەدا لە هەرێمی کوردستان لانیکەم نۆ کەس بە رووداوی هاتووچۆ گیانیان لەدەستداوە.
بە گوێرەی نوێترین ئاماری وەزارەتی ناوخۆی هەرێمی کوردستان بۆ رووداو، لە ساڵی 2018ـەوە تاوەکو مانگی ئابی 2025، لە هەرێمی کوردستان زیاتر لە 21 هەزار و 646 رووداوی هاتووچۆ روویان داوە، لە ئەنجامدا 3 هەزار و 137 کەس گیانیان لەدەست داوە و 39 هەزار و 339 کەسیش بریندار بوون.
