رووداو دیجیتاڵ
بە تێچووی زیاتر لە ملیارێک دینار، قۆناخی سێیەمی نۆژەنکردنەوەی رێگەی سماقووڵی دەستیپێکرد. ئەمەش دوای ئەوەی هاونیشتمانییان لە رێگەی رووداوەوە گلەییان لە خراپیی رێگەکە کرد.
رێگەی سماقووڵی یەکێکە لە رێگە سەرەکییەکانی بەستنەوەی ئیدارەی سەربەخۆی راپەڕین بە هەولێرەوە، هەروەها بۆ هاتووچۆی سلێمانی و هەولێریش بەکاردێت و بەشێکی سەرەکیی رێگەکە قیرەکەی بە تەواوی تێکچووە.
بەڕێوەبەرایەتیی رێگاوبانی هەولێر لە رێگەی تیمەکانی چاککردنەوە و پاراستنی رێگەوبانەوە، دەستیکرد بە نۆژەنکردنەوەی چاڵ و شکستەکانی رێگەی سەرەکیی زیارەت بۆ سماقووڵی.
رۆژی سێشەممە 7ـی ئەیلوولی 2026، ئاگرین عەبدوڵڵا، بریکاری وەزارەتی ئاوەدانکردنەوە و نیشتەجێکردن بە تۆڕی میدیایی رووداوی گوت: "پڕۆژەی نۆژەنکردنەوەی شەقامی سەرەکیی سماقووڵی بە درێژایی 24 کیلۆمەتر دەستیپێکردووە و کارکردن تێیدا بەردەوامە".
بریکاری وەزارەتی ئاوەدانکردنەوە گوتی: "ئێستا دەستکراوە بە قوناخی سێیەم کە 9 کیلۆمەترە و نۆژەنکردنەوەکە لە گوندی زیارەت دەستیپێکردووە تاوەکو کۆتایی رێگەی سماقووڵی".
باسی لەوەش کرد، "پڕۆژەکە لەسەر بودجەی ئاسایی وەزارەتی ئاوەدانکردنەوە بە تێچووی زیاتر لە یەک ملیار دینار جێبەجێ دەکرێت".
