رووداو دیجیتاڵ
وەزارەتی کارەبای هەرێمی کوردستان رایگەیاند، 1400 مێگاوات کارەبا بۆ نێو تۆڕی کارەبای نیشتمانی گەڕاوەتەوە و دۆخی کارەبا ئاسایی دەبێتەوە.
پێنجشەممە 17-09-2026 وەزارەتی کارەبای هەرێمی کوردستان لە راگەیێندراوێکدا رایگەیاند: "پڕۆسەی گواستنەوەی گاز لە کێڵگەی کۆرمۆر بۆ وێستگەکانی بەرهەمهێنانی کارەبا بەرەو ئاساییبوونەوە چووە و لە چەند کاژێری رابردوودا 1400 مێگاوات کارەبا بۆ نێو تۆڕی کارەبای نیشتمانی گەڕایەوە و دۆخی کارەبا بەرەو ئاساییبوونەوە چووە".
شەوی رابردوو پڕۆژەی رووناکی بە تۆڕی میدیایی رووداوی راگەیاند: "گەیشتنی گاز بە وێستگەکانی کارەبا لە ئاساییبوونەوەدایە و تاوەکو بەیانی زوو (پێنجشەممە) پێدانی کارەبا دەگەڕێتەوە بارودۆخی خۆی".
وەزارەتی کارەبای حکومەتی هەرێمی کوردستان دوێنێ رایگەیاند، بەهۆی کەمکردنەوەی هەناردەی گاز لەلایەن کۆمپانیای دانەگازەوە بۆ وێستگەکان، بەرهەمهێنانی کارەبا بە بڕی 1000 مێگاوات کەمی کردووە. ئەمەش راستەوخۆ کاریگەریی لەسەر پێدانی کارەبا لە هەولێر و دهۆک دروست کردووە، لە کاتێکدا لە سلێمانی و هەڵەبجە کارەبا 24 کاژێرییە.
کەمبوونەوەی کارەبای نیشتمانی زۆرترین کاریگەریی لەسەر پڕۆژەی رووناکی هەبوو، کە پڕۆژەکە ئەرکی دابینکردنی کارەبای 24 کاژێرییە بۆ هەرێمی کوردستان و وەکو خۆیان رایانگەیاندووە، زیاتر لە 85%ی هەرێمی کوردستان کارەبای بووە بە 24 کاژێری و بڕیارە تاوەکو کۆتایی ئەم ساڵ تەواوی کارەبای هاوبەشان ببێتە 24 کاژێری.
.webp&w=3840&q=75)
