رووداو - رادیۆ
کەمی ئامێرەکانی راکێشانی پارە (ATM)ی تایبەت بە بانکی بەغداد لە چوارچێوەی پڕۆژەی "هەژماری من"، قەرەباڵخی و ئاستەنگی زۆری بۆ مووچەخۆران لە سنووری ئاکرێ، بەردەڕەش و قەسرۆک دروستکردووە.
پێشمەرگەیەکی خانەنشین لەو سنوورە بە رادیۆی رووداوی راگەیاند: "لە تەواوی سنووری ئاکرێ، بەردەڕەش، قەسرۆک تاوەکو کەڵەک، تەنیا یەک ئامێری ATMـی بانکی بەغداد دانراوە، لە کاتێکدا زیاتر لە سێ هەزار مووچەخۆری پێشمەرگە، پۆلیس و ئاسایش سەر بەو بانکەن؛ مانگانە چەندین رۆژ لەنێو قەرەباڵخی و نۆرەدا دەمێنینەوە و زۆرجاریش پارە لە ئامێرەکەدا نامێنێت یان تێکدەچێت."
بەڕێوەبەری ناحیە: داواکاریی خەڵک رەوایە
لە بەرامبەردا، مەهران نێروەیی، بەڕێوەبەری ناحیەی قەسرۆک، بە رادیۆی رووداوی راگەیاند: "داواکاریی مووچەخۆران زۆر رەوایە و پشتگیرییان دەکەین؛ چەندین جار بە نووسراوی فەرمی و زارەکی پارێزگارمان لەم کێشەیە ئاگادار کردووەتەوە و بەڵێنی چارەسەرکردنمان پێدراوە، بەڵام هێشتا چاوەڕوانی جێبەجێکردنین تاوەکو ئامێری زیاتر دابنرێت."
ئەم کێشەیە لەکاتێکدایە کە بەپێی رێنماییەکانی بانکی ناوەندیی عێراق و پێوەرەکانی پڕۆژەی "هەژماری من"، پێویستە بانکە بەشداربووەکان بۆ هەر هەزار مووچەخۆرێک لانیکەم یەک ئامێری ATM لە سنوورە جوگرافییەکەدا دابنێن.
تۆڕی میدیایی رووداو بۆ وەرگرتنی روونکردنەوە لەسەر ئەم گرفتە، چەندین جار پەیوەندی بە بانکی بەغداد و تیمی پڕۆژەی "هەژماری من"ـەوە کرد، بەڵام وەڵامی پەیوەندییەکانیان نەدایەوە.
