رووداو دیجیتاڵ
وەزارەتی خوێندنی باڵا و توێژینەوەی زانستیی هەرێمی کوردستان رایدەگەیێنێت، ماوەی پڕکردنەوەی فۆڕمی زانکۆلاین 48 کاژێر درێژکرایەوە و تاوەکو ئێستاش 70٪ـی دەرچووانی ئەمساڵ داواکارییان بۆ زانکۆلاین پێشکەش کردووە.
رۆژی پێنجشەممە، 24ـی ئەیلوولی 2026، وەزارەتی خوێندنی باڵا و توێژینەوەی زانستی لە راگەیێندراوێکدا نووسیویەتی: "لەپێناو پێدانی دەرفەتی زیاتر بەدەرچووانی دوازدەی ئامادەیی، بۆ ئەوانەی تاوەکو ئێستا فۆڕمی (زانکۆلاین)ـیان پڕنەکردووەتەوە یان تەواویان نەکردووە، بڕیار درا ماوەی زانکۆلاین 48 کاژێری دیکە واتە تاوەکو کاژێر 12:00ـی شەوی شەممە، 26ـی ئەیلوولی 2026، بۆ دەرچووانی قۆناخی دوازدەی ئامادەیی درێژ بکرێتەوە."
لەراگەیێندراوەکە دا هاتووە، ئەو بڕیارە لەپێناو بەرژەوەندیی گشتی و پێدانی دەرفەتی زیاترە بەو دەرچووانەی ئەمساڵ کە بەهەر هۆکارێک بێت نەیانتوانیوە فۆڕمی زانکۆلاین پڕبکەنەوە، "لەئێستا دا دەتوانن سوودمەندبن لەم دەرفەتە و فۆڕمی زانکۆلاین تەواو بکەن، هەروەها دەرچووانی قوتابخانە و خوێندنگە نێودەوڵەتییەکان و پیشەییەکانیش بەهەمان شێوە دەتوانن سوود لەم دەرفەتە وەربگرن و لەو 48 کاژێرە دا فۆڕمی زانکۆلاین پڕبکەنەوە."
وەزارەتی خوێندنی باڵا هۆشداریش دەدات کە ئەمە دوایین دەرفەتە و چیتر ماوەی زانکۆلاین درێژ ناکرێتەوە، بۆیە داوا لەدەرچووانی قۆناخی دوازدەی ئامادەیی دەکات، ئەوانەی تاوەکو ئێستا فۆڕمەکەیان پڕنەکردووەتەوە، "پێویستە لەماوەی ئەو 48 کاژێرە دا پەلە بکەن و تەواوی هەوڵەکانیان بخەنە گەڕ بۆ پڕکردنەوە و تەواوکردنی فۆڕمی زانکۆلاین."
.webp&w=3840&q=75)
