رووداو دیجیتاڵ
پڕۆژەی رووناکی رایگەیاند، سبەی بەهۆکاری تەکنیکی هێڵی گواستنەوەی کارەبای رۆساک–سۆران–ئاکرێ رادەگیرێت و چەند وێستەگەیەک لە کار دەکەون.
رۆژی سێشەممە، 29ـی ئەیلوولی 2026، پڕۆژەی رووناکی بە تۆڕی میدیایی رووداوی راگەیاند، سبەی بەهۆکاری تەکنیکی هێڵی گواستنەوەی کارەبای رۆساک–سۆران–ئاکرێ رادەگیرێت، بەو هۆیەوە هەشت وێستگە لەکار دەکەون و پێدانی کارەبا لە بەشێک لە ناوچەکانی سۆران و دهۆک کەمدەبێتەوە.
پڕۆژەی رووناکی ئاماژە بەوە دەکات، سبەی چوارشەممە هێڵی گواستنەوەی کارەبای (رۆساک–سۆران–ئاکرێ 132 کەی ڤی) لە کاژێر 9:30ـی بەیانی تاوەکو 2:00ـی دوای نیوەڕۆ بەهۆکاری تەکنیکی رادەگیرێت.
بەپێی زانیارییەکانی پڕۆژەکە، ئەم وەستانە بە مەبەستی بەستنەوەی هێڵی کارگەی نوێی چیمەنتۆیە لە خەلیفان.
بەپێی زانیارییەکانی پڕۆژەی رووناکی بۆ رووداو، بەهۆی ئەو کارە تەکنیکییانەوە ئەم وێستگانە بۆ چەند کاژێرێک لە خزمەتگوزاری دەردەچن:
مۆبایلی جۆڵەمێرگ 132 کەی ڤی
مۆبایلی هەندرێن 132 کەی ڤی
مۆبایلی رەواندز 132 کەی ڤی
مۆبایلی سپیلک
مۆبایلی باسرما 132 کەی ڤی
وێستگەی خەلیفان 33 کەی ڤی
وێستگەی هەریر 33 کەی ڤی
وێستگەی ئامۆکان 132 کەی ڤی
پڕۆژەی رووناکی ئەوەشی خستووەتەڕوو، لە ئەنجامی لەکارکەوتنی کاتیی ئەو وێستگانەدا، لەو ماوەیەدا پێدانی کارەبا لەو ناوچانە و چەند ناوچەیەکی دیکەی سنووری ئیدارەی سەربەخۆی سۆران و پارێزگای دهۆک کەم دەبێتەوە.
پڕۆژەی رووناکی لە تشرینی دووەمی ساڵی 2024 لەلایەن مەسرور بارزانی، سەرۆکی حکومەتی هەرێمی کوردستانەوە راگەیێندرا. ئامانجی پڕۆژەکە دابینکردنی کارەبای 24 کاژێرییە و بڕیارە تاوەکو کۆتایی ساڵی 2026، تەواوی هەرێمی کوردستان بگرێتەوە و سیستمی بسووڵەی کۆن و کارەبای مۆلیدە کۆتایی پێ بهێنێت.
