رووداو دیجیتاڵ
دەنگێکی بەرز لە سنووری ئیدارەی سەربەخۆی سۆران لە پارێزگای هەولێر بیسترا، سەرپەرشتیاری ئیدارەکە دەڵێت: "بۆردوومان بووە". بەرپرسانی کۆمەڵەی شۆڕشگێڕی زەحمەتکێشانی کوردستانی ئێران دەڵێن، هێرشەکە بۆ سەر بارەگایەکی ئەوان بووە و زیانی گیانییان نییە.
هەڵگورد شێخ نەجیب، سەرپەرشتیاری ئیدارەی سەربەخۆی سۆران بە تۆڕی میدیایی رووداوی گوت: "بۆردوومانێک لە سنووری دۆڵی ئالانە بووە، بەڵام جارێ نازانین بە چ جۆرێکی چەک بووە و لێکۆڵینەوە دەکەین".
ئارام مودەریسی، ئەندامی کۆمیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئێران بە تۆڕی میدیایی رووداوی گوت: "هێرشەکە بە دوو مووشەک کراوە و بارەگایەکی ئێمەی لە دۆڵی ئالانە کردووەتە ئامانج".
عەلی رەنجبەری، بەرپرسی مەکتەبی پەیوەندییەکانی کۆمەڵەی شۆڕشگێڕی زەحمەتکێشانی کوردستانی ئێران بە رووداوی راگەیاند، هێرشەکە کاژێر 02:40 خولەکی ئەم دوانیوەڕۆیە بووە و بەر پرسگەی بارەگاکە کەوتوون و بەشێک لە باڵەخانەی پرسگەکە رووخاوە.
ئەو بەرپرسەی مەکتەبی پەیوەندییەکانی کۆمەڵە لەبارەی زیانە گیانییەکانی هێرشەکە گوتی، هیچ زیانی گیانییان نەبووە.
کۆمەڵەی شۆڕشگێری زەحمەتکێشانی کوردستانی ئێران لە راگەیێندراوێکدا رایگەیاند، "لەلایەن کۆماری ئیسلامیی ئێرانەوە هێرشی موشەکی کرایە سەر بنکە و بارەگاکانمان؛ بە خۆشحاڵییەوە رادەگەیێنین هێزەکانمان سەلامەتن".
بەگوێرەی بەدواداچوونی رووداو بۆ ئەو هێرشانەی دەکرێنە سەر هەرێمی کوردستان، لە دەستپێکی جەنگەوە لە 28ـی شوبات تاوەکو ئێستا بە زیاتر لە هەزار و 20 درۆن و مووشەک هێرش کراوەتە سەر هەرێمی کوردستان، لە ئەنجامدا 32 کەس گیانیان لەدەستداوە و 156 کەسیش بریندار بوون.



