رووداو دیجیتاڵ
ژمارەیەک لە هاوبەشانی کارەبا لە گەڕەکی هەشتی حەسارۆک لە شاری هەولێر کارەبایان بڕاوە، پڕۆژەی رووناکی رایگەیاندووە، بڕانی کارەبا بەهۆی سەرپێچییەوە بووە و دوای رێکارەکان کارەبایان بۆ دەگەڕێندرێتەوە.
پڕۆژەی رووناکی ئەمڕۆ پێنجشەممە 19-11-2026 بە تۆڕی میدیایی رووداوی راگەیاند: "لە چوارچێوەی کارە بەردەوامەکان بۆ فراوانکردنی تۆڕی کارەبا و نەهێشتنی سەرپێچییەکان، وەزارەتی کارەبا دەستی کردووە بە کاراکردنی چەندین گۆڕەری کارەبا لە گەڕەکی هەشتی حەسارۆک. پرۆسەکە خۆی لە بەکارخستنی چوار گۆڕەری نوێی کارەبا دەکات و خزمەتی نزیکەی 400 هاوبەشی نوێ دەکات لە گەڕەکەکە".
بەگوێرەی پڕۆژەی رووناکی، "پچڕاندنی سەرپێچی لە هەشتی حەسارۆک بەردەوام دەبێت لە چوارچێوەی کارەکانی فراوانکردن و گەیاندنی تۆڕی کارەبا".
لەبارەی کارپێکردنی گۆڕەرە نوێیەکانی گەڕەکی هەشتی حەسارۆک پڕۆژەکە دەڵێت: "بۆ بەکارخستنی ئەم گۆڕەرە نوێیانە و پاراستنی بەشداربووانی ناوچە دراوسێکان، تیمەکانی وەزارەت هێڵەکانی سەرپێچی کە بە نایاسایی راکێشرابوون بڕیوە. بەهۆی تێکەڵبوونی هێڵی موەلیدەی تایبەت و تۆڕی نیشتمانی لە ناوچەکەدا لەگەڵ کەیسەکانی سەرپێچی، ژمارەیەک لە هاوبەشانی کارەبا کە بە یاسایی خزمەتگوزاریی کارەبایان هەیە هێڵەکەیان پچڕا، لەم بارەیەوە وەزارەتی کارەبا دڵنیایی دەدات لەوەی بەزووترین کات کارەبا بۆ هەموو ئەو هاوبەشانە دەگەڕێتەوە".
وەزارەتی کارەبا لە راگەیێندراوێکدا داوا لەو دانیشتووانی هەشتی حەسارۆک دەکات کە بە شێوەیەکی نایاسایی هێڵی کارەبایان راکێشاوە، سەردانی فرۆشیاری وزە بکەن و بە شێوەیەکی یاسایی مامەڵەی دروستکردنی هەژماری کارەبا بکەن و بۆ ئەوەی کارەبایان بۆ بگەڕێندرێتەوە.



