رووداو دیجیتاڵ
گوتەبێژی یەکێتیی زانایانی ئایینیی کوردستان دەڵێ، یاریی GTA حەرامە و هۆکارەکەشی بۆ بوونی دیمەنی نەشیاو و هاندانی گەنجان بۆ کاری خراپ دەگەڕێنێتەوە.
د. عەبدوڵڵا شێرکاوەیی، گوتەبێژی یەکێتیی زانایانی ئایینیی کوردستان، میوانی بووڵتەنی کاژێر 10:00ی ئەمڕۆ هەینی 20-11-2026ی تۆڕی میدیایی رووداو بوو، باسی لە یارییەکە کرد و "بە حەرام و زۆر خراپ" پێناسەی کرد.
شێرکاوەیی گوتی: "دیمەنەکانی نێو یارییەکە زۆر نەشیاون و نەگونجاون بۆ نێو خێزانەکان، بۆیە یەکێتیی زانایان ئەم یارییە بە باش نازانێ، چونکە هاندانی بۆ تووندوتیژی و بەفیڕۆدانی کات تێدایە و تێچووی زۆریشی هەیە، بە دڵنیاییەوە حەرامە و دروست نییە؛ فرۆشتن و مامەڵەکردن بەو یارییە دروست نییە."
گوتەبێژی یەکێتیی زانایان گوتی: "لە یارییەکەدا هاندانی گەنجان بۆ بەکارهێنانی تووندوتیژی و دیمەنی زۆر زۆر نەشیاوی تێدایە و هانی نەهێشتنی سنوورە قەدەخەکراوەکان دەدات؛ گەنج رادەهێنێ کە بەکارهێنانی مادەی هۆشبەر و خواردنەوەی مادە کحولییەکان شتێکی ئاساییە، دیمەنی بەدڕەوشتی تێدایە بۆیە ئێمە بە حەرامی دادەنێین."
د. عەبدوڵڵا شێرکاوەیی دەڵێ: "ناکرێ یارییەک بێتە هەرێمی کوردستان لەجیاتی گەنجان بۆ پێشکەوتن ببات دەیانبات بۆ کاری خراپە؛ گەنجێک لە دونیای ئەم یارییانە بێتە دەرەوە رەنگە دەیان کێشە بۆ قوتابخانە و ماڵ دروست بکات، داوا لە لایەنی پەیوەندیدار دەکەم بێنە سەر هێڵ و بە زووترین کات رێگە لەو یارییە بگرن کە مەترسییە لەسەر خێزان و گەنجان بەتایبەت."
شێرکاوەیی ئاماژەی بەوە کرد، پێشتر یاریی هاوشێوە و مامەڵەی ئەلیکترۆنی کە زیانی بە خەڵک گەیاندووە حەرامیان کردووە و بەشێکی هاونیشتمانییان بەدەم فەتواکەیانەوە چوون.
گوتەبێژی یەکێتیی زانایان گوتیشی، لەگەڵ لایەنی پەیوەندیدار لە حکومەتی هەرێمی کوردستان لەسەر هێڵن بۆ قەدەخەکردنی یارییەکە.
پێنجشەممە 19-11-2026 نوێترین وەشانی GTA بڵاوبووەوە و خرایە بەردەست بەکارهێنەرانی لە جیهاندا.



