رووداو دیجیتاڵ
ئێوارەی ئەمڕۆ شەممە 21-11-2026، نێچیرڤان بارزانی، سەرۆکی هەرێمی کوردستان پێشوازیی لە فالح فەیاز، سەرۆکی دەستەی حەشدی شەعبی کرد، لە دیدارێکدا کە فوئاد حوسێن، وەزیری دەرەوەی عێراق ئامادەبوو، دۆخی سیاسیی عێراق و دوایین پێشهاتەکانی ناوچەکە تاوتوێ کران.
بەگوێرەی راگەیێندراوێکی سەرۆکایەتیی هەرێمی کوردستان، پەیوەندییەکانی نێوان هەولێر و بەغدا تەوەرێکی سەرەکیی گفتوگۆکان بووە، هەردوولا جەختیان لە گرنگیی بەهێزکردنی هاریکاری و هاوئاهەنگیی هاوبەش کردووەتەوە و پێداگرییان لەسەر پێویستیی چارەسەرکردنی کێشە هەڵپەسێردراوەکان لەسەر بنەمای دەستوور کردووەتەوە.
لە راگەیێندراوەکەدا هاتووە، تەوەرێکی دیکەی دیدارەکە تایبەت بووە بە تاوتوێکردنی گرنگیی هاریکاری و کاری پێکەوەیی نێوان تەواوی هێز و لایەنە عێراقییەکان، بە ئامانجی پاراستنی ئارامی و سەقامگیریی وڵات.


