رووداو دیجیتاڵ
گوتەبێژی لیژنەی ئاسایشی نیشتمانیی پەرلەمانی ئێران دەڵێت، لە یاداشتی لێکتێگەیشتنی تاران و واشنتندا، رێز لە هێڵە سوورەکانی وڵاتەکەی نەگیراوە. دەشڵێت، جەنگ کۆتایی نەهاتووە و هێشتا لەگەڵ ئەمریکا لە قۆناخی رووبەڕووبوونەوەدان.
رۆژی چوارشەممە، 17-06-2026، ئیبراهیم رەزایی، گوتەبێژی لیژنەی ئاسایشی نیشتمانیی پەرلەمانی ئێران رەخنەی لە دەقی یاداشتی لێکتێگەیشتنی نێوان تاران و واشنتن گرت و رایگەیاند، ناهاوسەنگە و تێیدا رێز لە هەموو هێڵە سوورەکانی ئێران نەگیراوە.
بەگوتەی ئیبراهیم رەزایی، سەرەڕای واژۆکردنی یاداشتی لێکتێگەیشتن، جەنگی نێوان ئەمریکا و ئێران کۆتایینەهاتووە و ''نابێ وا بیر بکرێتەوە لە قۆناخی رووبەڕووبوونەوە دەرچووین.''
گوتەبێژی لیژنەی ئاسایشی نیشتمانیی پەرلەمانی ئێران گوتی: "ئێمە لە جەنگێکی تێکەڵاوداین و دەبێ ئەو دەرفەتەی رەخساوە، بۆ بەهێزتربوونمانی بقۆزینەوە."
بەشێک لە بەرپرسانی حکومی و پەرلەمانتارانی ئێران رەخنەی تووند لە دەقی لێکتێگەیشتنی نێوان ئێران و ئەمریکا دەگرن و دەڵێن، یاداشتەکە دژی بەرژەوەندییەکانی وڵاتەکەیانە و تاران دەکاتە ''داگیرکراو''ـی واشنتن.
لە بەرامبەردا حکومەتی ئێران ئەو دژایەتیکردنە بە ''هەوڵی تێکدانی یەکڕیزیی وڵات'' هەژمار دەکات و رایگەیاندووە، سەرجەم هەنگاوەکانی دانوستاندن، بە بڕیاری موجتەبا خامنەیی، رێبەری کۆماری ئیسلامیی ئێران نراون.
گوتەبێژی لیژنەی ئاسایشی نیشتمانیی پەرلەمانی ئێران بەرگری لە رەخنەگرانی لێکتێگەیشتنەکە دەکات و دەڵێت، نابێ رەخنەگران بە "تووندئاژۆ" ناو ببرێن. ئەگەر ئەو کەسانە نەبووان، ئێستا سەربازانی ئەمریکی بەسەر سەرمانەوە بوون."
قسەکانی رەزایی لەکاتێکدان رۆژی دووشەممە دۆناڵد ترەمپ، سەرۆکی ئەمریکا رایگەیاند، هەینی 19ـی حوزەیران، رێککەوتن لەگەڵ ئێران لە جنێڤ واژۆ دەکرێت و بەوەش نەوت بە تەنگەی هورمزدا بۆ بازاڕەکانی جیهان دەڕوات.
هەمان رۆژ ئەنجوومەنی باڵای ئاسایشی نیشتمانیی ئێرانیش راگەیێندراوێکی بڵاوکردەوە کە تێیدا هاتووە: ''دانوستاندنەکان بۆ رێککەوتنی کۆتایی دوادەخرێن، تاوەکو ئەو کاتەی لایەنی بەرامبەر ئەرکەکانی خۆی بەپێی یاداشتنامەی لێکتێگەیشتن جێبەجێ دەکات."
یەکێک لەو خاڵانەی کە لە یاداشتەکەدا گونجێنراوە، هەڵگرتنی گەمارۆی دەریایی سەر بەندەرەکانی ئێرانە، لە بەرامبەر کردنەوەی تەنگەی هورمزدا.
.jpg&w=3840&q=75)
.jpg&w=3840&q=75)
