سێنتکۆم: بۆ دوازدەیەمین شەوی لەسەریەک هێرشمان کردە سەر ئێران

رووداو دیجیتاڵ 

فەرماندەیی ناوەندیی هێزەکانی ئەمریکا (سێنتکۆم) رایگەیاند، بۆ 12ـەمین شەوی لەسەریەک هێرشیان کردووەتە سەر ئێران و شەپۆڵیکی دیکەی هێرشەکانیان بە سەرکەوتوویی تەواو کردووە، هاوکات ئاماری جێبەجێکردنی گەمارۆ دەریاییەکانی سەر بەندەرەکانی ئەو وڵاتەشی بڵاوکردەوە.

سێنتکۆم لە راگەیێندراوێکدا بڵاویکردەوە، لە کاژێر 10:30 خولەکی شەوی 22ـی تەممووز بە کاتی رۆژهەڵاتی ئەمریکا، کە دەکاتە 5:30 خولەکی بەرەبەیانی رۆژی 23ـی تەممووز بە کاتی هەولێر، هێزەکانیان شەپۆلێکی دیکەی هێرشەکانیان بۆ سەر ئێران تەواو کردووە.

لە راگەیێندراوەکەدا هاتووە: "هێزەکانی ئەمریکا ئامانجە سەربازییەکانی ئێرانیان پێکا، لەنێویاندا تواناکانی هێزی دەریایی، کۆگاکانی مووشەک و درۆن، پێگەکانی چاودێریی کەناراوەکان و سیستمەکانی بەرگریی ئاسمانی. ئەم هێرشانەش توانای ئێران بۆ هێرشکردنە سەر دەریاڤانە سڤیلەکان و کەشتییە بازرگانییەکان زیاتر کەم دەکەنەوە."

فەرماندەیی ناوەندیی هێزەکانی ئەمریکا ئاماژەی بەوە کردووە: "لەم مانگەدا، هێزەکانی ئەمریکا دەیان پێگەی سەربازیی ئێرانیان لەسەر وشکانی کردووەتە ئامانج، لە کاتێکدا گەمارۆی دەریایی سەر ئێران دەستی پێکردووەتەوە."

هەروەها ئاماری گەمارۆکەشی ئاشکرا کردووە و دەڵێت: "تاوەکو ئەمڕۆ، سێنتکۆم رێڕەوی 9 کەشتیی بازرگانی گۆڕیوە و یەک کەشتیشی لەکارخستووە، بۆ ئەوەی رێگری بکات لە چوونەژوورەوە یان دەرچوونی کەشتییەکان لە بەندەرەکانی ئێرانەوە."

لە کۆتایی راگەیێندراوەکەشدا هاتووە: "زیاتر لە 50 هەزار سەربازی ئەمریکی لە سەرانسەری رۆژهەڵاتی نێوەڕاست لە ئەرکدان و بەردەوامن لەسەر پەیڕەوکردنی ئەوپەڕی وریایی، هۆشیاری، هێزی کوشندەیی و ئامادەیی تەواو."