رووداو دیجیتاڵ
خێزانی وەحید بنیامیریان، لە رێگەی کەناڵەکانی راگەیاندنی ئێران زانیان کوڕەکەیان لە سێدارە دەدرێت، کاتێک بڵاویان کردەوە دەسەڵاتی دادی ئێران سزای لە سێدارەدانەکەی پشتڕاستکردووەتەوە.
یەکێک لە خزمە نزیکەکانی وەحید کە لە دەرەوەی ئێران دەژی، بە ئاژانسی فڕانس پرێسی گوت: "هیچ ئاگادارکردنەوەیەکی پێشوەختەیان نەدا، تەنانەت پارێزەرەکەشی نەیدەزانی. ئەمە بە تەواوی نایاسایی بوو، تەنانەت بەپێی یاسا سەرکوتکەرەکانی خۆشیان."
وەحید بنیامیریان، مامۆستای زانکۆ و پسپۆڕی فیزیا، تەمەنی 34 ساڵ بوو، لەگەڵ پێنج کەسی دیکە بە تۆمەتی ئەندامێتی لە رێکخراوی موجاهیدینی خەلق سزای لەسێدارەدانیان بەسەردا سەپێنرابوو؛ هەر شەشیان سزاکەیان جێبەجێ کرا.
وەحید یەکێکە لەو دەیان زیندانییە سیاسییەی کە رێکخراوەکانی مافی مرۆڤ دەڵێن لەوەتەی دەسپێکی جەنگ لەگەڵ ئەمریکا و ئیسرائیل، لەلایەن ئێرانەوە لەسێدارەدراون.
چالاکڤانان دەڵێن ئێران لە مانگی ئاداری رابردووەوە پرۆسەی لە سێدارەدانی خێراتر کردووە، ئەوەش وەک هەوڵێک بۆ بڵاوکردنەوەی ترس لە ناو کۆمەڵگە و رێگری لە دووبارەبوونەوەی ئەو خۆپێشاندانە گەورانەی کە سەرەتای ئەمساڵ دەسەڵاتی تارانیان هەژاند.
دۆخی سیاسیی ئێران ئێستا یەکجار ئاڵۆزە، بەتایبەتی دوای کوژرانی عەلی خامنەیی لە یەکەم رۆژی جەنگدا و جێگرتنەوەی لەلایەن موجتەبای کوڕییەوە، کە تاوەکو ئێستا بە ئاشکرا دەرنەکەوتووە.
"ماشێنی کوشتن" و مەترسییەکان
ئێستا کە ئاگربەستە لەرزۆکەکە هەرەسی هێناوە، رێکخراوەکانی مافی مرۆڤ دەترسن ئێران پرۆسەی لە سێدارەدان وەک ئامرازێک بۆ بێدەنگکردنی خەڵک بەکاربهێنێت.
مەحموود ئەمیری-موقەدەم، بەڕێوەبەری رێکخراوی مافی مرۆڤی ئێران دەڵێت: "بەهۆی تێکچوونی ئاگربەست و دەستپێکردنەوەی جەنگ، زۆر نیگەرانین لەوەی دەسەڵاتداران ئەم بارودۆخە بقۆزنەوە بۆ چڕکردنەوەی لەسێدارەدانی زیندانییە سیاسییەکان."
ئەم رێکخراوە هۆشداری دەدات کە ئێستا "سەدان زیندانیی سیاسی و خۆپێشاندەر رووبەڕووی تۆمەتی کوشندە بوونەتەوە" و نزیکەی 100 کەسیان سزای لەسێدارەدانیان بۆ دەرچووە. تەنیا لە یەک زینداندا، کە زیندانی "دەستگەرد"ـە لە ئەسفەهان، زیاتر لە 70 کەس چاوەڕێی پەتی سێدارەن. رێکخراوەکە داوا دەکات کە پرسی راگرتنی "ماشێنی کوشتن" لە ئێران، ببێتە بەشێکی سەرەکیی هەر جۆرە دانوستاندنێکی نێودەوڵەتی لەگەڵ ئەو وڵاتە.
بەپێی داتاکانی رێکخراوی مافی مرۆڤی ئێران، لەوەتەی دەسپێکی جەنگەوە:
• 24 کەس بەهۆی خۆپێشاندانەکانی مانگی کانوونی دووەم و 2 کەسی دیکەش بەهۆی خۆپێشاندانەکانی ساڵی 2022 لەسێدارەدراون.
• 13 پیاو بە تۆمەتی پەیوەندی بە رێکخراوی موجاهیدینی خەلق و گرووپە قەدەخەکراوەکان هەڵواسراون.
• 10 کەس بە تۆمەتی سیخوڕیکردن لەسێدارەدراون.
• بە گشتی، لەم ساڵدا زیاتر لە 400 کەس لەسێدارەدراون، کە زۆربەیان تۆمەتی پەیوەست بە ماددە بێهۆشکەرەکان و کوشتنی ئەنقەستیان لەسەرە.
ناڕەزایەتی لە ناو زیندانەکاندا
وەک کاردانەوەیەک بەرامبەر بەم شەپۆلە، زیندانیانی زیندانی قزڵحەسار لە کەرەج، لە 13ـی تەممووزەوە دەستیان بە مانگرتن کردووە.
دیمەنە بڵاوکراوەکان نیشانی دەدەن کە زیندانییەکان لە بەردەم ژوورەکانیاندا دانیشتوون و دروشمی "نا بۆ سێدارە" دەڵێنەوە. زیندانییەکان لە بەیاننامەیەکدا دەڵێن: "ئەمانە ئەو زیندانییانەن کە تەنیا بۆ دابینکردنی پێداویستییە سەرەتاییەکانی ژیان تووشی هەڵە بوون و پەشیمانن؛ لە کوێی جیهاندا مرۆڤ بۆ یەکەم هەڵە ژیانی لێ دەسەندرێتەوە؟"
بەپێی راپۆرتی رێکخراوی لێبووردنی نێودەوڵەتی، ساڵی رابردوو ئێران زیاتر لە 2150 کەسی لەسێدارەداوە؛ بەمەش دوای چین، وەک گەورەترین جێبەجێکاری سزای لە سێدارەدان لە جیهاندا ماوەتەوە.
خزمە نزیکەکەی وەحید بنیامیریان دەڵێت، وەحید لە منداڵییەوە مرۆڤێکی "میهرەبان" بووە و هەمیشە هەستی بە بەرپرسیارێتی کردووە. تەنانەت لە دوایین رۆژەکانی زیندانیشیدا، ورەی هاوڕێکانی بەرزکردووەتەوە و پەیامێکی دەنگیی بۆ دایکی ناردووە و تێیدا دەڵێت: "ماڵاواییم لێکردیت و نەمدەزانی چی لە پێشە."
گرتەیەکی ڤیدیۆیی کە لە ناو زیندانەوە دزەی پێکراوە، نیشانی دەدات کە وەحید پێش بردنی بۆ سێدارە، لە حەوشەی زینداندا سروودێکی نیشتمانی دەڵێت. خزمەکەی دەڵێت: "ئەو رۆژەی بردیانن بۆ ژووری تاکەکەسی، وەحید بە هاوڕێکانی گوتبوو: لە بەردەم دوژمندا مەگرین، ئێمە شانازی بەوەوە دەکەین کە دەیکەین؛ ئەوان هەرگیز سەریان دانەنەواند."
