رووداو دیجیتاڵ بەرپرسێکی باڵا لە فەرماندەیی سەربازیی ئەمریکا کە سەرپەرشتیی جەنگی دۆناڵد ترەمپ دژی ئێران دەکات، لە رێگەی ئیمەیڵێکەوە داوایەکی ئاراستەی سەرباز و شارەزایانی سەربازی کردووە و تێیدا هاتووە: "پێویستمان بە بیرۆکەیە." ئەم هەوڵە نوێیەی واشنتن نیشانەی سنوورداریی ئەو بژاردانەیە کە لەبەردەم ترەمپدان بۆ ناچارکردنی تاران تاوەکو بە مەرجەکانی ئەو رازی بێت. بەپێی زانیارییەکانی سی ئێن ئێن، ئەفسەرێکی بەشی هەواڵگری لە فەرماندەیی ناوەندیی هێزەکانی ئەمریکا (سێنتکۆم)، رۆژی چوارشەممەی رابردوو پەیامێکی بۆ گرووپێکی فراوان لە شارەزایانی سەربازی ناردووە و تێیدا نووسیویەتی: "ئێمە بەدوای رێگەی نوێی داهێنەرانە دەگەڕێین بۆ گوشارخستنە سەر ئێران و سزادانی." سەرچاوەیەکی دیکەش پشتڕاستی کردەوە کە سێنتکۆم خەریکی پێداچوونەوەیە بە تەواوی ستراتیژییەکانی خۆیدا. تیمۆسی هاوکینز، گوتەبێژی سێنتکۆم، لەمبارەیەوە رایگەیاند، فەرماندەیی ناوەندی مێژوویەکی درێژی لە بیرکردنەوەی داهێنەرانەدا هەیە و گوتی: "ئەدمیراڵ کووپەر بە تایبەتی پەیوەندی بە ئەندامانی تیمە نایابەکەمانەوە دەکات، بێ گوێدانە پلە و پۆستەکانیان، تاوەکو بگەینە بەرزترین ئاستی کارایی ئۆپەراسیۆنەکان." وەستاندنی هێرشەکان و نێوەندگیریی سعودیە ئەم داوایەی سوپای ئەمریکا بۆ بیرۆکەی نوێ، پێش هەڕەشەکەی ترەمپ هات بۆ دەستپێکردنی هێرشی نوێ، کە دواتر لە کۆتایی هەفتەدا پاشەکشەی لێ کرد؛ ئەوەش دوای ئەوەی بەرپرسانی ناوچەکە و بەتایبەتی محەممەد بن سەلمان، شازادەی جێنشینی سعودیە، پەیوەندییان بە سەرۆکی ئەمریکاوە کرد و داوای هێورکردنەوەی دۆخەکەیان لێ کرد. هەرچەندە بۆ چەندین هەفتەیە ئەمریکا بە چڕی بۆردوومانی ئێران دەکات تاوەکو توانای هەڕەشەکردنی لە تەنگەی هورمز لاواز بکات، بەڵام تاوەکو ئێستا هیچ ئاماژەیەک بۆ گەیشتن بە رێککەوتن نییە. وێستگە ئەتۆمییەکان و کێشەی "کێوی قوڵنگ" دوو سەرچاوەی ئاگادار دەڵێن سوپای ئەمریکا بە چڕی ئامادەکاری دەکات بۆ لێدانی کێوی قوڵنگ و چەندین شوێنی دیکەی ئەتۆمیی ئێران. بەڵام کێشەکە لێرەدایە کە تەنانەت بەهێزترین چەکە کلاسیکییەکانی ئەمریکاش ناتوانن ئەو دامەزراوانە لەناو ببەن، چونکە لە قووڵاییەکی زۆری ژێر زەویدان. بۆ لەناوبردنی ئەو شوێنانە، ئەمریکا پێویستی بە ناردنی هێزی وشکانی دەبێت، کە ئەمەش سەرکێشییەکی گەورەیە و ترەمپ تاوەکو ئێستا ئامادە نییە ئەو هەنگاوە بنێت؛ بەتایبەتی کە لەوەتەی دەسپێکی جەنگەوە 18 سەربازی ئەمریکی کوژراون. سەرچاوەیەکی دیکە دەڵێت ترەمپ بیر لە هێرشێکی "نمایشی" دەکاتەوە کە زیاتر لایەنی سیمبوڵی هەبێت بۆ ئەوەی بتوانێت بە ناوی سەرکەوتنەوە لە جەنگەکە بێتە دەرەوە، بێ ئەوەی ئامانجە سەرەکییەکەی کە لەناوبردنی تەواوی بەرنامە ئەتۆمییەکەی تارانە، بپێکێت. هەواڵگری و سنوورەکانی هێزی ئاسمانی بەپێی راپۆرتەکەی کەناڵی (سی ئێن ئێن)، هەریەک لە ئاژانسی هەواڵگریی ناوەندی (سی ئای ئەی) و ئاژانسی هەواڵگریی بەرگری گەیشتوونەتە ئەو بڕوایەی کە ئەم جۆرە بۆردوومانانەی ئێستا ناتوانن هەڵوێستی تاران لە دانوستاندنەکاندا بگۆڕن. جەنەراڵ دان کەین، سەرۆکی ئەرکانی هاوبەشی سوپای ئەمریکا، مانگی رابردوو بە ئەندامانی کۆنگرێسی وڵاتەکەی گوت: "هێزی ئاسمانی سنووری خۆی هەیە و ناتوانێت هەموو ئامانجەکان بپێکێت." کەین نیگەرانیی خۆشی نیشانداوە لە کەمبوونەوەی کۆگاکانی مووشەکی بەرگریی ئاسمانیی ئەمریکا. هەروەها بەرپرسانی دیکە هۆشداری دەدەن کە ئەگەر ترەمپ هەڕەشەکانی بۆ لێدانی پرد و وێستگەکانی ئاو و کارەبا جێبەجێ بکات، ژمارەی قوربانیانی سڤیل بە شێوەیەکی ترسناک بەرز دەبێتەوە. لەنێوان بەڵێنەکانی هەڵبژاردن و راستیی جەنگدا ترەمپ ئێستا لەبەردەم دوو بژارەی سەختدایە؛ یان دەبێت هێزی وشکانی رەوانەی ئێران بکات و دەست بەسەر دوورگەی خارگدا بگرێت، کە ئەمەش شکاندنی ئەو بەڵێنەیە کە بە لایەنگرانی دابوو کاتێک دەیگوت: "ئێوە نانێرم بۆ جەنگە بێمانا و بێ کۆتاییەکانی دەرەوە." یانیش دەبێت قبووڵی بکات کە ناوچەکە لە ناو بازنەیەکی داخراوی هێرش و وەڵامدانەوەی بەردەوامدا بمێنێتەوە کە تێیدا تەنگەی هورمز هەمیشە لە مەترسیدا دەبێت. سەرۆکی ئەمریکا رۆژی هەینی لە کۆبوونەوەی کابینەی حکومەتەکەیدا گوتی: "ئێمە تەنیا دەمانەوێت سەربکەوین. زۆر بە تووندی لێیان دەدەین و لە کۆتاییدا دەگەنە ئاستێک کە بڵێن چیدی بەرگە ناگرین."
رۆژهەڵاتی نێوەڕاست03-08-2026ئەحمەد شەرع: پشتیوانی و میوانداریی هەرێمی کوردستان لە ساڵانی رابردوودا بەرز دەنرخێنین
