وردەکاریی رێککەوتنی سەربازیی نێوان سعودیە، تورکیا و پاکستان

لەنێو کۆشکی سەفا لە مەککە، لە (لووتکەی مەککەی پیرۆز بۆ بەرگریی هاوبەش)، رێککەوتنەکە لەلایەن محەممەد بن سەلمان، شازادەی جێنشینی سعودیە؛ رەجەب تەیب ئەردۆغان، سەرۆککۆماری تورکیا و شەهباز شەریف، سەرۆکوەزیرانی پاکستان بە ئامادەبوونی عاسم مونیر، فەرماندەی سوپای پاکستان واژۆکرا.

• بەرگریی هاوبەش: گرنگترین خاڵی رێککەوتنەکە ئەوەیە کە "هەر هێرشێکی چەکداری بۆ سەر یەکێک لەو سێ وڵاتە، بە هێرشکردنە سەر هەر سێ وڵاتەکە دادەنرێ."
• هاوکاریی سەربازی: هەر سێ وڵات لە هەموو بوارە سەربازییەکاندا هاوکاریی یەکدی دەکەن، وەک راهێنانی سەربازیی هاوبەش، ئاڵوگۆڕی تەکنەلۆجیا، زانیاریی هەواڵگری و دروستکردنی چەک پێکەوە.
• تەنیا بۆ بەرگرییە: دەسەڵاتداران جەخت دەکەنەوە کە ئەم رێککەوتنە تەنیا بۆ پاراستنی خۆیانە و دژی هیچ وڵاتێکی دیاریکراو نییە؛ هەروەها نایانەوێ وەک هاوپەیمانیی ناتۆ سوپایەکی یەکگرتوو دروست بکەن یان رێککەوتنەکانی پێشوویان هەڵبووەشێننەوە.
• دەرگای کراوە: رێککەوتنەکە کراوەیە بۆ ئەوەی لە داهاتوودا وڵاتانی دیکەی ناوچەکەش تێیدا بەشدار بن.

ئەم رێککەوتنە لە کاتێکدایە، گرژییەکانی رۆژهەڵاتی نێوەڕاست بەهۆی شەڕی ئەمریکا و ئیسرائیل لەگەڵ ئێران زیادیان کردووە و هێرش کراوەتە سەر وڵاتانی کەنداو و کەشتییە بازرگانییەکانەش.

ئەم هاوپەیمانییە سێ هێزی جیاواز کۆدەکاتەوە:

1. سعودیە: خاوەنی سامانی دارایی زۆر و پێگەیەکی بەهێزە لە ناوچەکەدا.
2. تورکیا: پیشەسازییەکی بەرگریی زۆر پێشکەوتووی هەیە و خاوەنی دووەم گەورەترین سوپایە لەنێو هاوپەیمانیی ناتۆدا.
3. پاکستان: ئەزموونێکی زۆری سەربازی هەیە و تاکە وڵاتی زۆرینە موسڵمانە کە خاوەنی چەکی ئەتۆمی بێت.

هەرچەندە راگەیێندراوەکان بڵاوکراونەتەوە، بەڵام دەقی تەواوی رێککەوتنەکە و وردەکاریی ئەوەی کە ئایا لە کاتی هێرشدا چۆن و بە چ شێوەیەک بە هانای یەکدییەوە دەچن، بە نهێنی هێڵدراوەتەوە. سعودیەش دووپاتی کردووەتەوە کە ئامانجیان دروستکردنی بلۆکێکی مەزهەبی یان کێبڕکێی چەکی ئەتۆمی نییە.