وەك ئەوەی نوێنەری عەبادی بێت، راوێژكارێكی سەرۆك كۆماری عێراق لە شاشەی تەلەڤزیۆنێكی كوردییەوە قسەی دەكرد. دەیویست بیسەلمێنێ كە عەبادی پیاوێكی چاك و نیازپاكە، چونكە چەند جارێك لە كۆبوونەوەكانی ئەنجوومەنی وەزیران ستایشی پێشمەرگەی كردووە.
ئەو، بە لۆژیكی گیرفانی گەرمەوە، بۆ حكومەتێك دەپاڕایەوە كە پتر لە ساڵێكە میللەتەكەی برسی دەكات.
ئەوەی عەبادی لە كۆبوونەوە داخراوەكاندا دەیڵێت، نەك هەر گرنگ نییە، بەڵكو وەك ئەوە وایە نەگوترابێ. ئاخر قسە چ بایەخێكی هەیە كە تۆ بە كردەوە درێژە بە سیاسەتی برسیكردنی پێشمەرگە و خەڵكی كوردستان بدەی.
بەو پێوەرە بێ، عەبادی ناحەقی نییە نەك هەر نانمان ببڕێ، باش نییە خەونبینینیشمان لێ قەدەخە ناكات. سەرۆك وەزیرانی عێراق ئەو جۆرە پارێزەرە كوردانەی هەبێ، باكی بە چییە؟ بۆچی تۆزقاڵێك لە سیاسەتی پەراوێزخستن و برسیكردنی خەڵكی هەرێمی كوردستان بسڵەمێتەوە؟
ئەو، بە هەموو ئەقڵی خۆیەوە دەیگوت، كێشەی نێوان هەرێم و بەغدا كێشەی سیاسی نییە. ئۆباڵی قوڵبوونەوەی كێشەكانیشی دەخستە ئەستۆی خودی كورد.
ناكرێ حكومەتی هەرێم لە هەڵە و بەرپرسیارێتی ئەو دۆخە بەدوور بگرین، بەڵام ئەوەش مانای ئەوە نییە خۆمان ببینە دەهۆڵكوت و زوڕناژەنی ئەو حكومەتە بۆگەنەی، ئامانجی رەزیلكردنی خەڵكی كوردستانە.
دەبێ ئەوە بزانین، بەڵێن و قسەكانی كاربەدەستانی بەغدا بۆ كورد لە موجامەلەی سیاسی زیاتر نین. بەداخەوە كورد لە گەرمەی مافخوران و غەدرلێكردنیدا، بە موجامەلەیەكی درۆزنانەی كاربەدەستێكی بەغدا، هەموو كەف و كوڵەكەی دادەمركێتەوە.
ئەو غەدرەی بەغدا لە هەرێمی كوردستانی دەكات، هی ئەمڕۆ نییە، ئەوە نەك هەر سیاسەتێكی نوێ نییە، بەڵكو هەر لە دەستپێكی عێراقی بەزۆر پێكەوە لكێنراوەوە، مێژوویەكی رەگداكوتاوی هەیە. لە هیچ قۆناخێكدا حكومەتەكانی عێراق وازیان لە سیاسەتی تەنگپێهەڵچنین و ستەمكاری خۆیان نەهێناوە. ئینجا ئەگەر كێشەی هەرێمی كوردستان لەگەڵ بەغدا سیاسی نەبێت، ئەی دەبێ چی بێ؟ ئەگەر بڕوا بەو راستییە نەهێنین، كەواتە هێشتا لە ئەلف و بێی سیاسەت تێنەگەیشتووین و روانینمان بۆ كێشەكان نەك هەر رۆشن نییە، بەڵكو زۆریش ساویلكانەیە.
لەم قۆناخەدا، كاربەدەستە كوردەكانی بەغدا، هەر لە سەرۆك كۆمارەوە بگرە تا جێگرانی سەرۆك وەزیران و سەرۆكی ئەنجوومەنی نوێنەران و وەزیر و ئەندامانی ئەنجوومەنی نوێنەران، بێ كاریگەرین و وەك مێروولەی ژێر پێی فیلیان لێهاتووە. بەڵام وەك ئەوەی بەخۆیان نەزانیبێ، زۆر جار خۆیان لێ وندەبێ و بە بیانوو هێنانەوە و هۆنینەوەی بەندو بالۆرەی جیا جیا، مەبەستیانە خۆڵ بكەنە چاوی میللەتەكەیان و وای نیشان بدەن، ئەوان شتن و زۆریان لەدەست دێ.
ئەی ئەگەر ئەو كاریگەرییەیان هەیە، ئەو گاڵتەجاڕییەی بەغدا بەرامبەر هەولێر بۆ تەواو نابێ؟ بوونی كورد لە بەغدا چ مانایەكی بۆ دەمێنێتەوە، ئەگەر خەڵكی كوردستان هەمیشە چاو لە دەستی بەغدا، بە چەشنی سواڵكەر بمێنێتەوە؟
ئاخر بەغدا وادەزانێ خێرمان پێدەكات، بە لۆژیكی ئەوەتان دەدەینێ و ناتاندەینێ كات دەكوژێ و دەمانترسێنێ.
لەم سۆنگەیەوە، هەست دەكرێت رۆڵی بەرپرسانی كورد لە بەغدا تەنێ لەسەر ئاستی قسە و لێدوان بۆ میدیا كورتبووەتەوە. ئەوان قسە گەورەی بێ كردەوەن. لەو دۆخە سەختەدا، هەزار قسە هیچ بە هایەكیان نییە.
ئەگەر بڵێین ئامادەیی بەرپرسانی ئێستای كورد لە بەغدا، لە ئامادەیی ئەو بەرپرسە كوردانەی سەردەمی حكومەتەكانی پێشووی عێراق دەچێ، رەنگە زێدەڕۆییمان نەكردبێ. راستە لەڕووی قۆناخ و ئەرك و كەسایەتییەوە، لێكچوونەكە رەوا نییە، وەلێ لەڕووی دەستكەوت و رۆڵبینینەوە، مەودایەكی دووریان نییە.
گەڕان بەدوای وەڵامی ئەو پرسیارەی ئایا كورد لە بەغدا چ كارەیە؟ نەك هەر زەحمەت نییە، بەڵكو زۆریش ئاسانە. بە خوێندنەوەی واقیع تێدەگەین، بەشداری كورد لە بەغدا تەنیا شكڵییە، ئەگەر خێرێكیشی هەبێ، بۆ خودی ئەو بەرپرس و نوێنەرانەیە.
تا ئەمڕۆ بەڵێنەكانی بەغدا لە قسەی رووكەشانە رەتی نەكردووە، بەمەش كێشەی نێوان هەولێر و بەغدا، نەك رێگەی چارەسەری نەدۆزیوەتەوە، بەڵكو تا دێ ئاڵۆزتر و پڕ گرێتر دەبێ.
پرسیار ئەوەیە، بەغدا لە كاتێكدا كە خوێنی لەبەر دەچۆڕێ و لەوپەڕی شكست و پشێویدایە، كەمترین مافمان پێ رەوا نابینێت، ئەی ئەگەر سبەی خۆی لە دۆخێكی بەهێزدا بینییەوە، دەبێ چ مامەڵەیەكمان لەگەڵدا بكات؟
هەنووكە كورد سەنگی مەحەكی لە هاوكێشە سیاسییەكانی عێراق لە دەستداوە و توانای بەدەستهێنانی مافەزەوتكراوەكانی نییە. زۆر زەحمەتە بەغدا بە ئاسانی بكەوێتە ژێر باری داواكانمان. هەروەك دەبینین لە كردنەوەی گرێ كوێرەی كێشەكاندا، هیچ جددیەتێكی لێ نابینرێت.
حكومەتی عێراق لە كێشەی نێوان هەرێم و بەغدادا بێ زیانە، ئەوەی باجەكە دەدات خەڵكی كوردستانە. بەغدا دەیەوێت بە سیاسەتی برسیكردن و بێبەشكردن لە مافەكانمان، بە هێواشی بمانكوژێ.
هێزی عێراق لە دیكتاتۆریەت و سڕینەوەی ئەوانی دیكەدایە. عێراق توانایەكی بێ هاوتای لە بەرهەمهێنانی ئازار و نەهامەتییەكاندا هەیە. راستە بارودۆخەكە گۆڕاوە، وەلێ هێشتا دەوڵەت بە هەمان فەلسەفە و ئەقڵیەتی جاران بەڕێوەدەچێ. عێراق رووبەرێكی راستەقینەیە لە نادادپەروەری و پەراوێزخستنی بەشێك لە نەتەوە و پێكهاتە جیاوازەكان.
بە كورتی ئەگەر بە فورمێكی تریشەوە بێ، عێراقی سەردەمی عەبادی جیاوازییەكی ئەوتۆی لەگەڵ عێراقی سەردەمی سەدام و جەعفەری و مالیكیدا نییە. بۆیە بێ هۆ نییە كە دەگوترێ، لە سایەی ئەو ئەقڵیەتەدا، هیوایەكی باشتر بۆ داهاتوو زۆر دژوارە.
.jpg&w=3840&q=75)