رووداو - هەولێر
ساڵح ئەدیبی کوردێکی سوننەی رۆژهەڵاتی کوردستان، وەک باڵێۆزی ئێران لە دوو وڵاتی ڤێتنام و کامبۆج دەستنیشانکرا.
ساڵح ئەدیبی کە پێشتر سەرۆکی دامەزراوەی شارەزایانی پارێزگای سنە بووە، لە لایەن حکومەتی حەسەن رۆحانی-یەوە وەک باڵیۆزی ئێران لە هەردوو وڵاتی ڤێتنام و کامبۆج دیارییکراوە.
ئەدیبی رۆژی سێشەممە 1-9-2015 رایگەیاند، سەرەتا وەک باڵیۆز بۆ باڵیۆزخانەی ئۆسترالیا دەستنیشانکراوم، بەڵام دواتر بەهۆی بوونی مسوڵمانانی سوننە مەزهەب لە وڵاتانی ڤێتنام و کامبۆج، وەک باڵیۆزی ئەو دوو وڵاتە دەستنیشانکرام.
ئەوە یەکەمجارە کە کوردێکی سوننە لە رۆژهەڵاتی کوردستان لە ماوەی سەردەمی دەسەڵاتدارێتی کۆماری ئیسلامی ئێران لە دوای ساڵی 1979-ی زایینیەوە، دەستنیشان بکرێت.
