بەخاکسپاردنی تەرمی پرۆفیسۆر د.جەمال نەبەز لە سلێمانی

رووداو - سلێمانی 

ئەمڕۆ شەممە 22-12-2018 ، لە رێوڕەسمێکدا تەرمی پرۆفیسۆر د. جەمال نەبەز لە گۆڕستانی گردی شێخ مارف لە سلێمانی بەخاکسپێردرا. 

دوای ئەوەی لە فڕۆکەخانەی نێودەوڵەتی هەولێر پێشوازی لە تەرمی پرۆفیسۆر د.جەمال نەبەز کرا و لەوێوە بەرەو سلێمانی بەڕێکرا، تەرمەکەی لەکاژێر 12:30 خولەکی نیوەڕۆی ئەمڕۆ گەیەنرایە سلێمانی و لەلایەن پارێزگار و چەندین کەسایەتی ئایینی و رۆشنبیری پارێزگاکەوە پێشوازی لێکرا.

لە رێوڕەسمەکەدا دەوەن مەعرووف، گوتاری بنەماڵەی پرۆفیسۆر د. جەمال نەبەزی خوێندەوە و سوپاسی سەرۆکوەزیران و هەردوو پارێزگاری هەولێر و سلێمانی کرد کە لەو خەمەدا لەگەڵ ئەوان بەشداربوون.

سەرلەبەیانی ئەمڕۆ شەممە 22-12-2018 لە رێوڕەسمێکدا بە ئامادەبوونی بەرپرسانی حکومەتی هەرێمی کوردستان، پارێزگای هەولێر، بنەماڵەی کۆچکردوو، بەشێک لە نووسەران و رۆشنبیران و هونەرمەندان لە فڕۆکەخانەی هەولێر پێشوازی لە تەرمی پرۆفیسۆر د.جەمال نەبەز کرا و بەرەو سلێمانی بەڕێکرا بۆ ئەوەی لەوێ بەخاکبسپێردرێت.

ئاکۆ محەممەد، بەڕێوەبەری گشتی تۆڕی میدیایی رووداو، چەپکە گوڵی رێزلێنانی لەسەر تەرمی پرۆفیسۆر جەمال نەبەز دانا.

رۆژی 08-12-2018، پرۆفیسۆر د. جەمال نەبەز، نووسەر و بیرمەندی نێوداری كورد لە تەمەنی 85 ساڵیدا، بەهۆی نەخۆشی لە نەخۆشخانەیەكی بەرلینی پایتەختی ئەڵمانیا كۆچی دواییكرد.

پرۆفیسۆر د. جەمال نەبەز یەكێكبوو لە دامەزرێنەرانی (كۆمەڵەی ئازادی و ژیانەوەو یەكێتیی كورد- كاژیك) و لەساڵی 1962ـەوە لە ئەوروپا دەژی و خاوەنی زیاتر لە 60 كتێب و سەتان لێكۆڵینەوەی زانستی و هزری و سیاسییە بە زمانەكانی : كوردی ، عەرەبی ، ئینگلیزی و ئەڵمانی . ماوەیەكی زۆر لە كوردستان ، عێراق و ئەڵمانیا مامۆستا بووە.

داڕشتنەوە؛ راوچی حەسەن