رووداو - تەندروستی
کۆمەڵەی پزیشکانی منداڵان لە ئەمریکا دەریدەخات، میزبەخۆداکردنی شەوانە لە تەمەنی نەوجەوانان بەهۆی چەند هۆکارێکی سەرەکییەوە روودەدات، وەک هۆکاری بۆماوەیی، دواکەوتنی گەشەی دەمارەکانی نێوان مێشک و میزڵدان، یان تێکچوونی هاوسەنگیی هۆڕمۆنەکان.
بەگوێرەی کۆمەڵەی پزیشکانی منداڵان لە ئەمریکا، دووبارە تووشبوونەوەی نەوجەوانان بە میزبەخۆداکردن دوای ماوەیەک لە چاکبوونەوە واتە ئەو نەوجەوانەی ماوەیەکی زۆر (شەش مانگ) یان زیاتر کێشەی نەبووە و دووبارە تووشی بووەتەوە، پێویستی بە پشکنینی پزیشکی هەیە، چونکە لەوانەیە نیشانەی هەوکردنی میزەڕۆ، گوشاری دەروونیی یان کێشەی دەماری بێت. هەروەها، هۆکاری بۆماوەیی کاریگەریی هەیە، بەجۆرێک ئەگەر دایک و باوک لە منداڵیدا کێشەکەیان هەبووبێت، ئەگەری تووشبوونی منداڵەکەیان 70% زیاد دەکات.
بۆ مامەڵەکردنێکی تەندروست لەگەڵ منداڵان و نەوجەوانانی تووشبوو، پسپۆڕان ئەم رێنوێنییانە دەدەن:
- پێویستە خێزانەکان پشتیوانیی دەروونیی نەوجەوان بکەن و بزانن کە کێشەکە لە دەرەوەی توانای ئەوانە، چونکە رەخنەگرتن، سزادان و گاڵتەکردن دۆخەکە خراپتر دەکات.
- لە ئێواران و پێش خەوتندا، خواردنەوەی شلەمەنییەکان، بەتایبەت ئەو خواردنەوانەی کافاینیان تێدایە، کەمبکەنەوە.
- بەکارهێنانی تەکنیکی نوێ وەک ئامێری هۆشیارکەرەوەی شەوانە، یان وەرگرتنی دەرمان دوای راوێژکردن بە پزیشک، بەتایبەت لە کاتی گەشتکردندا، دوو رێگەن بۆ چارەسەر.
- بۆ دەستنیشانکردنی هۆکاری سەرەکی و دابینکردنی چارەسەری گونجاو، پێویستە پشکنینی میز ئەنجام بدرێت و راوێژ بە پزیشکی پسپۆڕ بکرێت.



