رووداو دیجیتاڵ
مستەفا قەرەسو، ئەندامی کۆنسەی بەڕێوەبەریی کۆما جڤاکێن کوردستان (کەجەکە) رایگەیاند، پێویستە عەبدوڵڵا ئۆجەلان رۆڵی کاراتری لە پرۆسەی ئاشتیدا هەبێت و بۆچوونەکانی راستەوخۆ بە رای گشتی بگات. گوتیشی: "پرۆسەیەک بە ئازادیی ئۆجەلان تەواو نەبێت، ناگاتە هیچ ئەنجامێک."
مستەفا قەرەسو لە هەڤپەیڤینێکدا داوای کرد پرۆسەی ئاشتی شەفافتر بەڕێوەبچێت و رێگە خۆشبکرێ بۆئەوەی عەبدوڵڵا ئۆجەلان راستەوخۆ پەیام ئاراستەی کۆمەڵگەی تورکیا و کورد بکات و لەگەڵ هێز و لایەنە سیاسییەکان کۆببێتەوە.
لەبارەی یاسای تایبەت بە پرۆسەی چارەسەری، قەرەسو ئاماژەی بەوەدا دەرچوواندنی یاسایەکە لە پەرلەمانی تورکیا قۆناخێکی نوێیە، بەڵام پێویستی بە هەنگاوی کردارییە.
قەرەسو گوتیشی، کورتکردنەوەی پرۆسەکە تەنیا بۆ پرسی چەکدانان هەڵەیە و بنەما سەرەکییەکانی پرۆسەکە بریتین لە بەدیموکراسیکردن و چارەسەرکردنی پرسی کورد.
ئەم لێدوانانەی مستەفا قەرەسو لە کاتێکدایە کە پرۆسەی چارەسەری لە تورکیا پێی ناوەتە قۆناخێکی نوێ.
تورکیا لە رێگەی ئەنجوومەنی هاوئاهەنگی و یەکگرتوویی نیشتمانی کە لەلایەن یاریدەدەری سەرۆککۆماری تورکیاوە سەرپەرشتی دەکرێ، چوار لیژنەی بۆ بەرێوەبەردن و چاودێریکردنی پرۆسەی چارەسەری دامەزراندووە کە رێگە بۆ چەکدانان و گەرانەوەی گەریلاکانی پەکەکە خۆشدەکات.
