رووداو دیجیتاڵ ئەندامانی هاوپەیمانیی باکووری ئەتڵەسی (ناتۆ) لە لووتکەی ئەنقەرەدا، پابەندبوونی خۆیان بۆ پاراستنی ئاسایشی بەکۆمەڵ بەپێی بەندی پێنجەمی پەیماننامەی واشنتن دووپاتکردەوە و بودجەی نوێی سەربازیی گەورەیان بۆ بەرەنگاربوونەوەی هەڕەشەکان و پاڵپشتیکردنی ئۆکراینا راگەیاند. زیادکردنی بودجەی بەرگری و بەهێزکردنی پیشەسازیی سەربازی ئەم بڕیارانەی ناتۆ دوای زنجیرەیەک دانوستاندنی چڕی نێوان سەرکردەکانی هاوپەیمانییەکە دێن لە پایتەختی تورکیا. بۆ بەرەنگاربوونەوەی ئەو "هەڕەشە درێژخایەنە"ـی رووسیا لەسەر ئاسایش و سەقامگیریی ناوچەی یۆرۆ-ئەتڵەسی دروستی دەکات، هاوپەیمانان بەڵێنیاندا پابەندبوونی بەرگریی لاهای جێبەجێ بکەن. لەم پێناوەشدا، لە ساڵی 2025دا، هاوپەیمانانی ئەورووپی و کەنەدا بودجەی بەرگرییان بە بڕی زیاتر لە 139 ملیار دۆلار زیاد کردووە. هاوکات لە لووتکەی ئەنقەرەدا، ناتۆ دابینکردنی زیاتر لە 50 ملیار دۆلاری بۆ کڕینی کەرەستەی نوێی سەربازی راگەیاند و پابەندبوونی خۆی بۆ فراوانکردنی توانای بەرهەمهێنانی بەکۆمەڵ و کارکردن لەگەڵ کەرتی پیشەسازیی نیشاندا بۆ خێراکردنی داهێنانەکان و لابردنی بەربەستەکانی بەردەم بازرگانیی بەرگری. بونیادنانی داهاتوویەکی بەهێزتر و تەکنەلۆژیای جەنگیی نوێ سەرکردەکانی هاوپەیمانییەکە جەختیان لە گرنگیی بونیادنانی ئەورووپایەکی بەهێزتر لە نێو ناتۆیەکی بەهێزتردا کردەوە. لەم چوارچێوەیەدا، هاوپەیمانانی ئەورووپی و کەنەدا، بە هاوکاری لەگەڵ ویلایەتە یەکگرتووەکانی ئەمریکا، بەرپرسیارێتییەکی زیاتر بۆ بەرگریی هاوپەیمانییەکە دەگرنە ئەستۆ. رێگری و بەرگریی ناتۆ لە داهاتوودا لەسەر تێکەڵەیەکی گونجاو لە تواناکانی بەرگریی ئەتۆمی، کلاسیکی و مووشەکی دەبێت، کە بە هۆکارەکانی بۆشایی ئاسمان و سایبەر پاڵپشت دەکرێن. ناتۆ وەبەرهێنان دەکات لەسەر توانای جێگیرکردن و چالاککردنی هێزە چەکدارەکانی لە هەموو بوارەکان. کۆنترۆڵکردنی هەڕەشەکان و پاراستنی ئازادیی کەشتیوانی هاوپەیمانییەکە بەردەوام دەبێت لە وەڵامدانەوە و خۆگونجاندن لەگەڵ کێبڕکێی ستراتیژی، ناسەقامگیریی گشتگیر و هەڕەشە تێکەڵەکان. لە بەشێکی راگەیێندراوەکەدا بە توندی هۆشداری دراوەتە ئێران و سەرکردەکان دووپاتیان کردەوە کە نابێت ئێران هەرگیز ببێتە خاوەنی چەکی ئەتۆمی، داواش دەکەن تاران بە تەواوی رێز لە ئازادیی کەشتیوانی لە تەنگەی هورمز بگرێت. راگەیێندراوی لووتکەی ئەنقەرە -ئێمە، سەرکردەی وڵاتان و حکومەتەکانی هاوپەیمانیی باکووری ئەتڵەسی (ناتۆ)، لە ئەنقەرە کۆبووینەوە بۆ دووپاتکردنەوەی پابەندبوونی پۆڵایینی خۆمان بە بەرگریی بەکۆمەڵمان بەپێی بەندی 5ـی پەیماننامەی واشنتن و پەیوەندیی نێوان هەردوو بەری زەریای ئەتڵەسی. هێرشکردنە سەر یەکێکمان هێرشە بۆ سەر هەموومان. یەکگرتوویی، هاوپشتی و هێزی بەکۆمەڵی ئێمە وەک بنەمای ئاشتی، ئاسایش و خۆشگوزەرانی بۆ یەک ملیار هاووڵاتیی هاوپەیمانییەکەمان لە وڵاتە ئازاد و دیموکراسییەکان دەمێنێتەوە. ئێمە پابەند دەبین بە گرتنەبەری رێبازی 360 پلەییمان بۆ رێگری و بەرگری. -بۆ بەرەنگاربوونەوەی ئەو هەڕەشە درێژخایەنەی رووسیا لەسەر ئاسایش و سەقامگیریی ناوچەی یۆرۆ-ئەتڵەسی دروستی دەکات، هەروەها هەڕەشەی بەردەوامی تیرۆر، هاوپەیمانان پابەندبوونی بەرگریی لاهای جێبەجێ دەکەن. لە ساڵی 2025دا، هاوپەیمانانی ئەورووپی و کەنەدا وەبەرهێنانیان لە پێداویستییە بنەڕەتییەکانی بەرگری بە بڕی زیاتر لە 139 ملیار دۆلار زیاد کردووە. وەبەرهێنانەکانمان ئەو توانایانە دابین دەکەن کە پێویستمانن، لە کاتێکدا بنکەی پیشەسازی و خۆڕاگریمان بەهێز دەکەن. ئەمڕۆ لە ئەنقەرە، دابینکردنی زیاتر لە 50 ملیار دۆلار بۆ کڕینی کەرەستەی نوێ رادەگەیێنین و پابەند دەبین بە فراوانکردنی توانای بەرهەمهێنانی بەکۆمەڵ و کارکردن لەگەڵ کەرتی پیشەسازی بۆ خێراکردنی داهێنانەکان. بەردەوام دەبین لە کارەکانمان بۆ نەهێشتنی بەربەستەکانی بازرگانیی بەرگری لە نێوان هاوپەیمانان و بەکارهێنانی هاوبەشییەکانی ناتۆ بۆ بەرزکردنەوەی هاوکاری و قووڵایی پیشەسازیی بەرگری تا دوا ئاست. -ئێمە داهاتوو بونیاد دەنێین: ئەورووپایەکی بەهێزتر لە نێو ناتۆیەکی بەهێزتردا – هاوپەیمانییەکی نوێبووەوە. هاوپەیمانانی ئەورووپی و کەنەدا، بە هاوکاری لەگەڵ ویلایەتە یەکگرتووەکانی ئەمریکا، بەرپرسیارێتییەکی زیاتر بۆ بەرگریی هاوپەیمانییەکە دەگرنە ئەستۆ. رێگری و بەرگریی ناتۆ بەندە بە تێکەڵەیەکی گونجاو لە تواناکانی بەرگریی ئەتۆمی، کلاسیکی و مووشەکی، کە بە هۆکارەکانی بۆشایی ئاسمان و سایبەر تەواو دەکرێن. ئێمە پابەندین بە پاراستنی باڵادەستیی جەنگیمان. وەبەرهێنان دەکەین لەسەر توانامان بۆ جێگیرکردن، چالاککردن و بەردەوامبوونی هێزە چەکدارەکانمان و بەدیهێنانی ئامانجەکانی توانامان لە سەرجەم بوارەکان، لەوانەش هێرشی وردی قووڵ، بەرگریی ئاسمانی و مووشەکیی یەکگرتوو، سیستمە بێ فڕۆکەوانەکان، تەکنەلۆژیا پێشکەوتووەکان و تواناکانی هەواڵگری. -ئۆکراینا بەشدارە لە دابینکردنی ئاسایشی ئەتڵەسی، هاوپەیمانانیش یەکدەنگن لە پشتگیریکردنی نەگۆڕیان بۆ ئۆکراینا لە بەرگریکردن لە ئازادی، سەروەری و یەکپارچەیی خاکەکەی. ئێستا هاوپەیمانانی ئەورووپی و کەنەدا زۆربەی هاوکارییە ئەمنییەکانی ئۆکراینا لە رێگەی دوولایەنە و فرەلایەنەوە دابین دەکەن. هاوپەیمانان جەخت دەکەنەوە کە پێویستە ئەم پشتگیرییە دادپەروەرانە، پێشبینیکراو و درێژخایەن بێت. بۆ ساڵی 2026، هاوپەیمانان بەڵێنی دابینکردنی 70 ملیار یۆرۆ لە کەرەستەی سەربازی، هاوکاری و مەشقکردن بۆ ئۆکراینا دەدەن و پابەندبوونی سەروەریی خۆیان بۆ پاراستنی لانیکەم هەمان ئاست لە ساڵی 2027دا دووپات دەکەنەوە. بۆ ئەم مەبەستەش، پێشوازی لە بڕیارەکەی یەکێتیی ئەورووپا دەکەین بۆ دابینکردنی بودجەی فرەساڵە بۆ ئۆکراینا لە رێگەی قەرزی پاڵپشتیی ئۆکرایناوە. -هاوپەیمانییەکە بەردەوام دەبێت لە وەڵامدانەوە و خۆگونجاندن لەگەڵ کێبڕکێی ستراتیژی، ناسەقامگیریی گشتگیر، هەڕەشە تێکەڵەکان و شۆکە دووبارەبووەوەکان کە ژینگەی ئاسایشی بەرفراوانمان پێناسە دەکەن. هاوپەیمانان دووپاتی دەکەنەوە کە نابێت ئێران هەرگیز ببێتە خاوەنی چەکی ئەتۆمی، داواش لە ئێران دەکەن بە تەواوی رێز لە ئازادیی کەشتیوانی لە تەنگەی هورمز بگرێت. -ئێمە پێزانینی خۆمان بۆ پێشوازی و میوانداریی گەرمی تورکیا دەردەبڕین. بە پەرۆشەوە چاوەڕێی کۆبوونەوەی داهاتوومانین.
.jpg&w=3840&q=75)
.jpg&w=3840&q=75)