رووداو دیجیتاڵ
حکومەتی بەریتانیا رایگەیاند: بەهۆی تێکچوونی باری ئەمنی و زیادبوونی گرژییەکان لە ناوچەکەدا، بە شێوەیەکی کاتی ستافە دیپلۆماسییەکانی لە ئێران کشاندووەتەوە؛ هاوکات جارێکی دیکە هۆشداریی تووندی دایە هاووڵاتییانی کە گەشت بۆ ئەو وڵاتە نەکەن.
رۆژی چوارشەممە، 22ـی تەممووزی 2026، وەزارەتی دەرەوەی بەریتانیا لە بەیاننامەیەکدا ئاشکرای کرد: "بەهۆی بەردەوامیی نالەباریی دۆخی ئەمنی، وەک رێکارێکی خۆپارێزی، بڕیارمان دا بە کێشانەوەی کاتیی ستافی بەریتانیا لە ئێران. باڵیۆزخانەکەمان لەمەودوا بەشێوەی دوورەدەست بەردەوام دەبێت لە کارەکانی."
وەزارەتی دەرەوە لە پەیامێکدا بۆ هاووڵاتییانی وڵاتەکەی رایگەیاندووە: "ئامۆژگاریتان دەکەین بە هیچ شێوەیەک گەشت بۆ ئێران نەکەن. ئەگەر تۆ هاووڵاتییەکی بەریتانییت و ئێستا لە ئێران نیشتەجێیت یان وەک گەشتیار لەوێیت، بە وردی پێداچوونەوە بە مانەوەتدا بکە و رەچاوی ئەو مەترسییانە بکە کە بەهۆی مانەوەت رووبەڕووت دەبنەوە."
ئەم بڕیارەی بەریتانیا بۆ چۆڵکردنی باڵیۆزخانەکەی لە تاران، دەرەنجامی راستەوخۆی هەڵکشانی شەڕ و پێکدادانەکانی نێوان ویلایەتە یەکگرتووەکانی ئەمریکا و کۆماری ئیسلامیی ئێرانە.
لە 11 رۆژی رابردوودا، ئاگربەستە لەرزۆکەکەی نێوان هەردوولا بە تەواوی داڕما، دوای ئەوەی ئەمریکا وەک تۆڵەیەک بۆ هێرشە دەریاییەکان، رۆژانە هێرش دەکاتە سەر پێگە سەربازییەکانی ئێران لە باشووری وڵاتەکەدا. لە وەڵامدا، ئێران هێرش دەکاتە سەر پێگەکانی ئەمریکا لە کەنداو، بەتایبەتی وڵاتانی کوێت و بەحرێن.
فاکتەرێکی دیکەی گرنگ کە وایکردووە لەندەن دیپلۆماتەکانی بکێشێتەوە، بڕیاری هەفتەی رابردووی حکومەتی بەریتانیا بوو بۆ ناساندنی سوپای پاسدارانی ئێران وەک "رێکخراوێکی تیرۆریستی."
ئەم هەنگاوە تووڕەیی زۆری تارانی لێکەوتەوە و بەرپرسانی بەریتانیا دەترسن کە کارمەندە دیپلۆماسییەکانیان ببنە ئامانجی تۆڵەسەندنەوە.
بەریتانیا وەک هاوپەیمانێکی سەرەکیی ئەمریکا لەم جەنگەدا دەبینرێت.
