رووداو دیجیتاڵ
رووسیا بەژمارەیەک مووشەکی بالیستی هێرشی کردە سەر کیێڤی پایتەختی ئۆکراینا و لە ئەنجامدا 9 کەس کوژران. ئەمەش لە کاتێکدایە کە دۆناڵد ترەمپ، سەرۆکی ئەمریکا هێشتا دوودڵە لە پێدانی مۆڵەت بە ئۆکراینا بۆ ئەوەی خۆی مووشەکی بەرگریی ئاسمانیی پاتریۆت دروست بکات، کە زۆر پێویستیەتی بۆ بەرپەرچدانەوەی ئەم هێرشانە.
بەهۆی زۆربوونی هێرشەکانی رووسیا، ئێستا ئۆکراینا زۆرترین پێویستی بە سیستەمی بەرگری هەیە بۆ تێکشکاندنی مووشەکە بالیستییەکان کە خستنەخوارەوەیان زەحمەتە.
زیانەکانی هێرشەکەی رووسیا
ڤیتالی کلیچکۆ، سەرۆکشارەوانیی کیێڤ رایگەیاند، بەهۆی هێرشەکەی شەوی رابردووەوە 9 کەس کوژراون و 28 کەسیش بریندار بوون.
تیمەکانی فریاگوزاری دەڵێن، ئاگرکەوتنەوە و وێرانکاری لە 5 ناوچەی پایتەختدا روویداوە. لە ناوچەی دارنیتسکی، 7 کەس کوژراون و باڵەخانەیەکی کارگێڕی ئاگری گرت، لە ناوچەی سۆلۆمیانسکیش 2 کەس کوژران دوای ئەوەی مووشەکێک بەشێکی باڵەخانەیەکی 5 نهۆمیی وێران کرد و سووتاندوویەتی.
"گوێم لە تەقینەوەیەکی زۆر ترسناک بوو، پاشان شووشە وەک باران دەباری و خەڵک رایدەکردە دەرەوە..."
— ئۆکسانا، دانیشتووی کیێڤ
رۆژێک پێشتریش لە هێرشەکانی رووسیادا 10 کەسی دیکە لە ناوچە جیاجیاکان کوژرابوون.
لەلایەکی دیکەوە، وەزارەتی بەرگریی رووسیا رایگەیاند، ئەم هێرشە "زۆر وردانە" تەنیا ناوەندەکانی پیشەسازیی سەربازی و لۆجستیی ئۆکراینایان لە کیێڤ و دەوروبەری کردووەتە ئامانج. سەرۆکی ئۆکرایناش باسی لەوە کرد کە یەکێک لەو مووشەکە بالیستییانەی رووسیا بەکاریهێناوە، دروستکراوی کۆریای باکوور بووە.
دوودڵیی ترەمپ لەسەر پاتریۆت
وەزیری دەرەوەی ئۆکراینا بەپەلە داوای سیستەمی بەرگریی ئاسمانی و مووشەکی زیاتری کرد و گوتی "خێرایی لە بڕیارداندا زۆر گرنگە."
سەرەتای مانگی تەممووز، ترەمپ رایگەیاندبوو کە بەنیازە رێگە بە ئۆکراینا بدات خۆی مووشەکی پاتریۆت دروست بکات، بەڵام رۆژی هەینی لە کۆبوونەوەیەکدا لە کەمپ دەیڤید قسەکەی گۆڕی و گوتی: "ئەم چەکانە زۆر پێشکەوتوون. دەبێت زۆر وریابین لەوەی رێگە بە چ وڵاتێک دەدەین دروستیان بکات. ئێمە هێشتا رەزامەندیمان نەداوە و سەرقاڵی تاوتوێکردنی بابەتەکەین."
پێشتریش بە رۆژنامەی فینانشەڵ تایمزی گوتبوو کە "دڵنیا نییە" مۆڵەتی دروستکردنی ئەو مووشەکانە بە ئۆکراینا بدات.
جێی باسە، کێشەی کەمیی سیستەمی بەرگریی ئاسمانی لە ئۆکراینا زۆر قورستر بووە، بەتایبەتی دوای ئەوەی لە 28ی شوباتەوە ئەمریکا و ئیسرائیل هێرشیان کردە سەر ئێران و بەشێکی زۆری چەکەکان بۆ ئەو جەنگە تەرخانکران.
پۆڵەندا و ئۆکراینا وەڵام دەدەنەوە
رۆژی پێنجشەممە، پۆڵەندا رووسیای تۆمەتبار کرد بەوەی لە کاتی بۆردوومانی ئۆکراینادا، مووشەکێکی رووسی کەوتووەتە نێو خاکی پۆڵەندا هەرچەندە زیانی گیانی نەبووە.
لە بەرامبەر هێرشەکانی رووسیادا، سوپای ئۆکراینا هێرشەکانی بۆ سەر ناوچە دوورەکانی نێو قووڵایی رووسیا زیاتر کردووە و زۆرجار ژێرخانی وزە و نەوتی ئەو وڵاتە دەکاتە ئامانج.
