رووداو دیجیتاڵ
وەزارەتی بەرگریی رۆمانیا رایگەیاند، فڕۆکەیەکی جەنگیی ئیسپانی کە لە چوارچێوەی ئەرکەکانی ناتۆدایە، درۆنێکی لە نزیک سنوورەکانی ئۆکراینا و مۆڵدۆڤا خستووەتە خوارەوە. ئەمە نوێترین پێشهاتی بەزاندنی ئاسمانی وڵاتانی ئەندام لە ناتۆیە بەهۆی جەنگی ئۆکرایناوە.
وەزارەتی بەرگریی رۆمانیا رۆژی یەکشەممە، 16-08-2026، لە راگەیێندراوێکدا ئاشکرای کرد، فڕۆکەیەکی جۆری F-18 کاژێر 5:01ـی بەیانی بەرپەرچی درۆنەکەی داوەتەوە کە لە خاکی مۆڵدۆڤاوە هاتبووە نێو ئاسمانی رۆمانیا.
پێدەچێت پاشماوەی درۆنەکە لە ناوچەیەکی چۆڵ لە هەرێمی گالاتای نزیک سنووری ئۆکراینا کەوتبێتە خوارەوە.
رۆمانیا کە ژمارەی دانیشتووانی 19 ملیۆن کەسە، یەکێکە لەو وڵاتانەی ناتۆ کە زۆرترین کاریگەریی جەنگی ئۆکراینای لەسەرە، چونکە سنوورە رۆژهەڵاتییەکانی لەسەر دەریای رەش زۆر نزیکن لەو ناوچانەی ئۆکراینا کە بەردەوام لەلایەن رووسیاوە بۆردوومان دەکرێن.
لە ساڵی 2023ـەوە، دەسەڵاتدارانی رۆمانیا چەندین جار پاشماوەی درۆنیان لە خاکەکەیاندا دۆزیوەتەوە. لە کۆتایی تەممووزی ئەم ساڵیشدا، رۆمانیا بۆ یەکەمجار لە دەسپێکی جەنگی رووسیا و ئۆکراینا لە شوباتی 2022، درۆنێکی لە دووریی 100 کیلۆمەتر لە بوخارێستی پایتەخت خستە خوارەوە.
جگە لە رۆمانیا، وڵاتانی پۆڵەندا و وڵاتانی باڵتیکیش کە دەکەونە رۆژهەڵاتی هاوپەیمانێتیی ناتۆ، چەندین جار رووبەڕووی بەزاندنی ئاسمانی وڵاتەکەیان بوونەتەوە. رۆژی هەینیش ناتۆ رایگەیاند کە فڕۆکە جەنگییەکانی ئیتاڵیا درۆنێکیان لە ئاسمانی لاتیڤیا تێکشکاندووە.
جەنگی نێوان رووسیا و ئۆکراینا کە لە شوباتی 2022ـەوە دەستیپێکردووە، ناوچەکەی خستووەتە قۆناخێکی زۆر مەترسیدارەوە. وڵاتانی هاوسنووری ناوچەی شەڕ لەژێر گوشارێکی زۆری ئەمنیدان و ناتۆ ئەرکە ئاسمانییەکانی بۆ پاراستنی ئاسمانی ئەو وڵاتانە چڕتر کردووەتەوە. ئەم پێشهاتە نوێیانە مەترسیی پێکدادانی راستەوخۆی نێوان رووسیا و ناتۆ زیاد دەکەن، هەرچەندە هاوپەیمانێتییەکە هەوڵ دەدات تەنیا وەک بەرگریی مامەڵە لەگەڵ درۆنەکاندا بکات.
