رووداو دیجیتاڵ
ریچارد واڵتەرز، جێگری بەرپرسی ستافی کۆشکی سپی، دەستلەکارکێشانەوەی خۆی لە پۆستەکەی پێشکێش کرد. ئەمەش وەک یەکەمین دەستلەکارکێشانەوەی گەورە دادەنرێ لە چوارچێوەی ئەو شەپۆلە گۆڕانکارییەی چاوەڕوان دەکرێ دوای دەستبەکاربوونی ستیڤن میڵەر وەک بەرپرسی نوێی ستافی کۆشکی سپی رووبدات.
رۆژی هەینی، دۆناڵد ترەمپ، سەرۆکی ئەمریکا دوای شکستی کۆمارییەکان لە هەڵبژاردنی نیوەخولی کۆنگرێسدا ستیڤن میڵەری لە شوێنی سوزی وایڵز وەک بەرپرسی نوێی ستافی کۆشکی سپی دەستنیشان کرد.
رۆیشتنی واڵتەرز کە یەکێک بوو لە نزیکترین هاوپەیمان و یاریدەدەرە سیاسییەکانی وایڵز و پەیوەندیی نێوانیان بۆ زیاتر لە 10 ساڵ دەگەڕێتەوە، ئاماژەیە بۆ دەستپێکی گۆڕانکاری لە کۆشکی سپی و وەرگرتنی پێگە بەهێزەکان لەلایەن تیمەکەی میڵەرەوە.
واڵتەرز لە راگەیێندراوێکدا رایگەیاند: "خزمەتکردنی سەرۆک ترەمپ گەورەترین شانازیی ژیانم بووە و هەمیشە سوپاسگوزاری سوزی وایڵز دەبم بۆ ئەم دەرفەتە. ستیڤن تیمێکی بڕواپێنەکراو و لێهاتوو بۆ جێبەجێکردنی کارنامەی سەرۆک پێکدەهێنێت و منیش لە دەرەوە بە پەرۆشەوە چاوەڕوانی بەشداریکردنم لەو هەوڵانەدا."
لە بەرامبەردا، ستیڤن میڵەر ستایشی واڵتەرزی کرد و گوتی: "ریچارد ئەندامێکی زۆر بەنرخی کۆشکی سپی بووە و یارمەتیدەر بووە لە بەدەستهێنانی گەورەترین سەرکەوتنەکانی ئیدارەکە. هەرچەندە ئەو کۆشکی سپی جێدەهێڵێت، بەڵام لە دەرەوە بەردەوام دەبێت لە هاوکاریکردنمان، لە کاتێکدا ئێمە بە هەموو هێزمانەوە کاردەکەین بۆ سەرخستنی سەرۆک ترەمپ و خەباتە بوێرانەکەی بۆ رزگارکردنی ئەمریکا."
واڵتەرز رۆڵێکی بەرچاوی لە هەر سێ هەڵمەتی هەڵبژاردنی سەرۆکایەتیی دۆناڵد ترەمپدا هەبووە و بەڕێوەبەری جێبەجێکاری لێژنەی دەستبەکاربوونی ترەمپ بوو لە ساڵی 2025دا، پێش ئەوەی لە مانگی ئایاری ئەم ساڵدا پەیوەندی بە تیمی کۆشکی سپییەوە بکات.
