پێکهاتەکانی کەرکووک لەرێگەی شانۆوە پەیامی پێکەوەژیان دەگەیەنن

رووداو - کەرکووک 

فێستیڤاڵەکە لەلایەن وەزارەتی رۆشنبیری حکومەتی هەرێمی کوردستان بە سپۆنسەری میدیایی تۆڕی میدیایی رووداو رێکخراوە و چوار رۆژ بەردەوام دەبێت.

خالید دۆسکی، وەزیری رۆشنبیریی حکومەتی هەرێمی کوردستان دەڵێ "وەکو حکومەتی هەرێمی کوردستان گرنگی تایبەت بە کەرکووک و ناوچە دابڕاوەکان دەدەین، سازدانی ئەم فێستیڤاڵە بۆ گەیاندنی پەیامی شانۆکارانی کورد و عەرەبیشە، پەیامەکە پەیامی پێکەوەژیان و ئاشتییە".

زیاتر لە 150 هونەرمەندی شانۆ و درامای کوردی و عێراقی بەشدارییان لە فێستیڤاڵەکەدا کردووە و دوێنێ لە یەکەم رۆژی فێستیڤاڵەکە، بەرهەمی بەغدا و بەسرە و هەر چوار پارێزگاکەی هەرێمی کوردستان و دوو تیپی کەرکووک نمایشکران.

ناسر حەسەن، دەرهێنەری دراما دەڵێ "جێی شانازییە لە کەرکووک لەم کاتەدا فێستیڤاڵێکی وا بکرێ و خەڵکێ زۆر ئامادەبن".

عەبدولی حەمەجوانی هونەرمەندیش باس لەوە دەکات "بەڕاستی فێستیڤاڵەکە جێگەی گەورەیە بۆ هەموو هونەرمەندان و کوردێک کە شانازی بە کەرکووکەوە دەکات".

هەروەها عەلی کەریم، هونەرمەند لەبارەی فێستیڤاڵەکە دەڵێ لێرە "هونەرمەندان رۆشنبیران یەکدەگرنەوە و، ئاڵوگۆڕی بیر و باوەڕ و بۆچوونەکانیان دەکەن".

خولی یەکەمی فێستیڤاڵی شانۆیی کەرکووک وەکو رێزێک بەناوی هونەرمەندی کۆچکردوو، جیهاد دڵپاک ناونراوە، رووناک دڵپاک، هاوژینی هونەرمەندی کۆچکردوو دەڵێ "ئێمە دڵمان پێی خۆشە و شتێکی جوانیان کرد، سوپاسی هونەرمەندان دەکەم".

رۆژانە دوو شانۆگەری و دوو دیداری رەخنەیی بۆ نمایشەکان و دیدارێکی تایبەتمەند لەسەر پرسە جیاجیاکانی شانۆ لەچوارچێوەی فێستیڤاڵەکە پێشکەش دەکرێن.

 

پێداچوونەوە: هەڵات رێبوار

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger