رووداو دیجیتاڵ
هونەرمەندی ناوداری کورد زاهیر جەلال، تووشی جەڵتەی مێشک بووە و ئێستا لە نەخۆشخانە لەژێر چاودێریدایە.
هونەرمەند زانای ساز، بە تۆڕی میدیایی رووداوی راگەیاند، درەنگانی شەوی رابردوو، هونەرمەند زاهیر جەلال تووشی جەڵتەی مێشک بووە و گەیێندراوەتە نەخۆشخانە، ئێستا لەژێر چاودێری چڕی پزیشکیدایە.
زاهیر جەلال ساڵی 1961 لە سلێمانی لە دایكبووە. تاوەكو پۆلی دووی ناوەندی خوێندووە و ئێستا لە خوێندنگەی پێشكەوتن لە هەوارە بەرزە، نووسەری خوێندنگەیە.
جگە لە گۆرانیگوتن، ئەکتەرێکی دیاری کۆمێدیایە و بە نوکتە و قسەخۆشی ناوبانگی دەرکردووە.
پێشتر لە چاوپێکەوتنێکیدا لەگەڵ رووداو گوتبووی "هەر لەمنداڵییەوە شەیدای هونەری نواندن بووە، زۆر حەزیشی لە نوكتەیە ئەگەر بتوانی چۆن ترش و خوێی نوكتە بكەیت، ئەوا پێت ناگوترێت قەرەباڵخ، لەوانەیە بگوترێت لێزانە".
