هەڵەیەک روویدا! دووبارە هەوڵبدە
رووداو - تەندروستی
ڤیدیۆیەکی دوو مۆدێلی بەنێوبانگی هۆڵیوود لە تۆڕە کۆمەڵایەتییەکان بڵاوبووەتەوە کە مادەیەکی دژە پیربوون لەڕێگەی دەمارەوە وەردەگرن و بانگەشەی ئەوە دەکەن کە ئیدی پیرنابن، پسپۆڕێکی نەخۆشییەکانی پێست و جوانکاریش دەڵێت: ئەوە بە سرووشتی لە جەستەدا هەیە.
ئەمڕۆ یەکشەممە 6-4-2025 د. نیان جاف، پسپۆڕی نەخۆشییەکانی پێست و جوانکاری لە بووڵتەنی تەندروستیدا بە رووداو راگەیاند، ئەو مادەیەی ئەو دوو مۆدێلە بۆ تەمەندرێژی بەکاریان هێناوە بە سرووشتی لەنێو خانەکانی جەستەدا هەیە و وزە بە خانەکانی جەستە دەبەخشێت.
هەر بۆیە د. نیان جاف روونی دەکاتەوە، هێشتا توێژینەوەکان لەو ئاستەدا نین کە پشت بە تەواوکەری خۆراکیی NAD ببەسترێت بۆ رێگری لە پیربوون و ئاماژەی بەوەشکرد کە دەشێت ببێتەهۆی دەرکەوتنی نیشانەکانی هەستیاری لەکاتی وەرگرتیندا.
د. نیان جاف چەند رێگەیەک بۆ بەگەنجی هێشتنەوەی پێست پێشنیازدەکات وەکو؛
- وەرزشی رۆژانە
- خۆپاراستن لە تیشکی خۆر لە کاتە گەرمەکان
- خەوی رێک
- تەواوکەرە خۆراکییەکانی ڤیتامینەکان بە راوێژی پزیشک
- بەکارهێنانی شێدارکەرەوە و دژەخۆر
- کەمکردنەوەی گوشاری دەروونی
ئەو دوو مۆدێلە؛ هێڵی بیبەری هاوژینی جەستن بیبەر و کینداڵ جێنەرن، لەکاتی وەرگرتنی مادەکە هێڵی بیبەر دەڵێت: ''هەموو تەمەنم مادەی NAD وەردەگرم و هەرگیز پیرنابم''، ئەمەش دەنگدانەوەی زۆری بەدوای خۆیدا هێنا و لە جیهاندا چەندین کەس هەوڵیان داوە وەکو ئەم دوو مۆدێلە ئەم مادەیە وەربگرن.
پسپۆڕانی زانکۆی تۆیامای یابان ئاشکرای دەکەن، مادەکە بە سرووشتی لەجەستەدا هەیە و لەگەڵ هەڵکشانی تەمەن رێژەکەی کەمدەبێتەوە، ئەمەش دەبێتەهۆی دەرکەوتنی نیشانەکانی پیربوون.
بەگوێرەی پەیمانگەی تەندروستیی نیشتمانی لە بەریتانیا؛ +NAD رۆڵێکی سەرەکی دەگێڕێت بۆ رێگری لە پیربوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ