رووداو - تەندروستی
توێژینەوەیەک لە ئەمریکا ئاشکرای دەکات، بای سکی ژنان لە هی پیاوان بۆگەنترە، بەڵام ئەو بۆگەندارییەش سوودێکی گرنگی بۆ مێشک هەیە.
توێژینەوەکە لەلایەن توێژەرانی ناوەندی توێژینەوەی شاری مێنیسۆتای ئەمریکا کراوە و دەرکەوتووە، بۆگەنداریی بای سک دەگەڕێتەوە بۆ پێکهاتەی گۆگرد و سۆڵفایدی هایدرۆجین، ئەم دوو مادەیەش بۆنەکەیان نزیکە لە هێلکەی گەنیو.
جگە لەمانەش توێژەران ئەوە دەڵێن کە ئەو پێکهاتە کیمیاییەی لە گازەکانی گەدەوە دەردەچێت و بۆنێکی ناخۆشی هەیە، یارمەتیدەرە بۆ پاراستنی مێشک لە نەخۆشیی ئەڵزهایمەر و وا لە خانەکانی مێشک دەکات، درەنگتر بپووکێنەوە.
لە توێژینەوەیەکی جیاواز لە ساڵی 2021دا سەلمێندرا کە مادەی سۆڵفایدی هایدرۆجین خانەکانی بیرەوەری دەپارێزێت.