دکتۆر بەهێز حوسێن - پاکەتێک لە تەواوکەری خۆراکیی مەگنسیۆم.
رووداو - تەندروستی
دەرمانسازێک روونیدەکاتەوە، مەگنیسیۆم چەندین جۆری هەیە و هەر یەکەیان بۆ چارەسەری کێشەیەکی تەندروستیی دیاریکراو بەکاردەهێنرێت، بەڵام پێویستە بە راوێژی پزیشک وەربگیرێت.
ئەمڕۆ چوارشەممە 15-4-2026 دکتۆر بەهێز حوسێن، دەرمانساز لە بوڵتەنی تەندروستی رایگەیاند، "مەگنیسیۆم گلایسینەیت و مەگنیسیۆم سیتریت زۆر بەکاردەهێنرێن، مەگنیسیۆم سیتریت رێژەی مەگنیسیۆم لە جەستەدا بەرزدەکاتەوە، بەڵام مەگنیسیۆم گلایسینەیت زیاتر بۆ ئەوانە بەکاردێت کە کێشەی دڵەڕاوکێ و خەویان هەیە."
دکتۆر بەهێز حوسێن ئاماژە بەوە دەکات، جۆرێکی دیکەی مەگنیسیۆم کە بە "ئێڵ-سریۆنەیت" ناسراوە بۆ باشترکردنی یادگە بەسوودە، هەروەها ئەو کەسانەی کێشەی گەدەیان هەیە باشتر وایە مەگنیسیۆم بە شێوەی پاودەر بەکاربهێنن.
دەرمانسازەکە هۆشداری دەدات و دەڵێت، "ئەوانەی کێشەی گورچیلە یان لاوازیی لێدانی دڵیان هەیە، نابێت دەرمان و تەواوکەری خۆراکی بەکاربهێنن." هەروەها روونیدەکاتەوە کە مەگنیسیۆم لەگەڵ هەندێک دەرمانی پەستانی خوێن و دژەبەکتریادا کارلێک دەکات، بۆیە دەبێت 2 بۆ 4 کاژێر دوای بەکارهێنانی ئەو دەرمانانە بخورێت.
لە کۆتاییدا، دکتۆر بەهێز جەخت لەوە دەکاتەوە کە بۆ بەکارهێنانی هەر جۆرە تەواوکەرێکی خۆراکی پێویستە راوێژ بە پزیشکی پسپۆڕ بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ