خاوەن پاڵاوگەکانی هەولێر 25 بارهەڵگر هاوکاری دەنێرنە رۆژئاوای کوردستان

لە نێو هاوکارییەکاندا، چیرۆکی جیاواز هەن؛ یەکێک لەوان پیاوێکە کە خۆی کوڕی ئەنفالە، ئەو کە ئازاری مەینەتی چەشتووە، ئێستا لەگەڵ هاوڕێکانی بووەتە هەوێنی کۆکردنەوەی ئەم کاروانە بۆ سووککردنی باری سەرشانی لێقەوماوانی رۆژئاوا.

دیدار زوبێر بارزانی، خاوەنی یەکێک لە پاڵاوگەکانە، بە رووداوی گوت: "دوای ئەوەی کە سەرۆک بارزانی داوایکرد کە هاوکاری بنێرێتە رۆژئاوا و بەهانای خوشک و براکانمان بچین ئێمەش بە ئەرکی خۆمان دەکات، ئێمەش بە حەماسەت وەرمانگرت و کەمپینێکمان راگەیاند و 25 بارهەڵگر هاوکاریمان کۆکردەوە، سەبەتە خۆراکییەکان 25 ماددەی تێدایە."

عەبدوڵڵا سەعید تەندورە، سەرۆکی ئەنجوومەنی خاوەن پاڵاوگەکانی هەولێر لەبارەی کۆکردنەوەی هاوکارییەکان گوتی: "ئەوە کاری ئێمە بووە هەمیشە، ئێمە هەر کاتێک نیشتیمانەکەمان و کوردستانەکەمان پێویستی بە ئێمە بوبێت ئامادە بووین."

بەگوتەی ئەو کەسانەی بەشدارییان لە کەمپینەکەدا کردووە بۆ کۆکردنەوەی هاوکارییەکان، ئەو 25 بارهەڵگرە پڕن لە پێداویستییە سەرەکییەکان 

وەلی عومەر، ئەویش خاوەنی پاڵاوگەیە و هاوکاریی بۆ کەمپینەکە کۆکردووەتەوە بەوردی باسی سەرجەم ئەو پێداویستییانەی بۆ رووداو کرد، دەڵێت: "9 بارهەڵگریان ئاردە، 7 بارهەڵگر ئازووقەیە، 6 بارهەڵگر پەتاتەیە، 2 بارهەڵگر بەتانی و دۆشەکە، 1 بارهەڵگر پیازە، بە پشتیوانی خودا بەرێیان دەکەین بۆ کوردانی خۆمان لە بۆ رۆژئاوای کوردستان."

بڕیارە رۆژی چوارشەممە، ئەو کاروانە لە رێگەی دەزگای خێرخوازیی بارزانییەوە بگەیێندرێتە رۆژئاوای کوردستان.

ئەمە لە کاتێکدایە، پێشتریش هەر لە رێگەی ئەو دەزگایەوە، 321 بارهەڵگر هاوکاریی جۆراوجۆر گەیێندراونەتە رۆژئاوای کوردستان.

پێشتر تۆڕی میدیایی رووداو لە رێگەی کەمپینی (رەنجی رووداو) بۆ رۆژئاوایی کوردستان، 126 بارهەڵگری گەیاندە رۆژئاوای کوردستان.