رووداو دیجیتاڵ
وەزارەتی بەرگریی تورکیا، بۆردوومانکردنی 37 پێگەی پارتی کرێکارانی کوردستان- پەکەکە -ی لە چەند ناوچەیەکی هەرێمی کوردستان راگەیاند.
بە گوێرەی راگەیێندراوەکەی وەزارەتی بەرگریی تورکیا، فڕۆکە جەنگییەکانی سەر بە فەرماندەیی هێزەکانی ئاسمانی و بە هاوئاهەنگی میت، ئەمڕۆ 3ـی تەممووز 37 پێگەی پەکەکەیان لە هەرێمی کوردستان بۆردوومان کردووە.
لە راگەیێندراوەکەدا ئاماژە بە شوێنە بۆردوومانکراوەکان کراوە، لەوانەش ناوچەکانی مەتین، گارە، خواکوڕک، قەندیل و ئاسۆس. ئاماژە بەوەشکراوە حەشارگە، ئەشکەوت، کۆگا و پەناگەی پەکەکە کراونەتە ئامانج
کامەران عوسمان، ئەندامی تیمی کوردستانی عێراقی رێکخراوی تیمەکانی دروستکەری ئاشتیی کۆمەڵگە (CPT)، بە تۆڕی میدیایی رووداوی گوت: "لە کاژێر 8:35ـی ئەمشەو (چوارشەممە، 3-7-2024) سوپای تورکیا لە رێگەی فڕۆکەی جەنگی و فڕۆکەی بێفڕۆکەوانەوە، سێ جار بۆردوومانی دەووروبەری گوندی زێوکەی لە قەزای پشدەر کرد."
هەر ئەمشەو و بە دیاریکراوی دوای کاژێر 09:00ــی شەو، لەڕێگەی فڕۆکەی جەنگییەوە تورکیا هێرشیکردووەتە سەر گوندەکانی ساڵیاوایان لە قەزای پێنجوێن و بناویان و شێخەڵمارێنیان لە ناوچەی شارباژێڕ، بەهۆیەوە ئاگر لەو ناوچانە کەوتووەتەوە.
سەرچاوەیەکی بەرپرسی قەزای پێنجوێنیش بە رووداوی گوت: "تاوەکو ئێستا زیانەکان دیارنین، بەڵام پێناچێت هیچ هاووڵاتییەک لەو هێرشانەدا کوژرابێت.".
لەچوارچێوەی زنجیرە بۆردوومانەکانی ئێوارەی ئەمڕۆدا، فڕۆکە جەنگییەکانی سوپای تورکیا یەکجار بۆردوومانی (لۆفەکانی کورتەک) و دوو جار بۆردوومانی (گوندی سڵێ)ـیان لە ناحیەی سەنگەسەر لە قەزای پشدەر کرد.