وەزارەتی خوێندنی باڵا چارەنووسی ئەو خوێندکارانەی یەکلاکردەوە لە زانکۆ لاین وەرنەگیرابوون

ئەمڕۆ دووشەممە، 03-11-2025، عەباس ئەکرەم، گوتەبێژی وەزارەتی خوێندنی باڵا و توێژینەوەی زانستی بە تۆڕی میدیایی رووداوی راگەیاند: "ئەو 892 خوێندکارەی کە بەهۆی کەمیی هەڵبژاردنی بەش و کۆلێژەکان لە فۆرمی زانکۆلاین وەرنەگیرابوون، بە فەرمانی وەزیری خوێندنی باڵا و توێژینەوەی زانستی، دەرچەی خوێندنیان بۆ کرایەوە و لە زانکۆ و پەیمانگەکان وەرگیران."

بەپێی رێنوێنییەکانی وەزارەت، پێویستە هەر خوێندکارێک لەکاتی پڕکردنەوەی فۆرمی زانکۆلایندا، ناوی 50 بەش و کۆلێژ بە ریزبەندی بنووسێت، بەڵام ئەو خوێندکارانە ژمارەیەکی زۆر کەمتریان هەڵبژاردبوو، بۆیە لەلایەن وەزارەتەوە فۆرمەکانیان رەتکرایەوە و داوایان لێکرا دووبارە پڕی بکەنەوە.

گوتەبێژی وەزارەتی خوێندنی باڵا ئاماژەی بەوەشکرد، لە کۆی گشتیی خوێندکارە وەرگیراوەکان، 860 خوێندکاریان دەرچووی پۆلی 12ی ئامادەیی (بەشەکانی زانستی و وێژەیی) بوون و 32 خوێندکارەکەی دیکەش دەرچووی بەشە پیشەییەکانن.

سەبارەت بە مامەڵەی وەرگرتن، عەباس ئەکرەم گوتی: "خوێندکارە وەرگیراوەکان دەتوانن لە ئەمڕۆوە سەردانی ئەو زانکۆ و پەیمانگەیانە بکەن کە لێی وەرگیراون و دەست بە مامەڵەکانیان بکەن."

پێشتر رۆژی 14-10-2025، وەزارەتی خوێندنی باڵا ئەنجامی وەرگرتنی خوێندکارانی لە زانکۆ و پەیمانگەکان راگەیاندبوو. بەپێی ئامارەکانی وەزارەت، ئەم ساڵ 57 هەزار و 980 خوێندکار پۆلی 12ی ئامادەییان تەواو کردووە و لە بەرامبەردا 65 هەزار و 476 کورسیی خوێندن لە زانکۆ و پەیمانگەکاندا بۆ پلانی وەرگرتن دابینکرابوون.