رووداو دیجیتاڵ
بەیانی ئەمڕۆ هێرشکرایە سەر بارەگای پارتی ئازادی کوردستان لە نزیک دێگەڵە لە پارێزگای هەولێر و بەرپرسی پەیوەندییەکانی ئەو حیزبەش دەڵێ، پێشمەرگەیەک گیانی لەدەستداوە.
رۆژی چوارشەممە 4/3/2026 ئەدیب خالیدیان، ئەندامی سەرکردایەتی و بەرپرسی پەیوەندییەکانی پارتی ئازادی کوردستان بە رووداوی راگەیاند: "لە ئەنجامی هێرشێک بۆسەر بارەگای پارتی ئازادی کوردستان لە نزیک دێگەڵە پێشمەرگەیەکمان بەناوی جەلال رەشیدی کە خەڵکی سەقزە و منداڵێکی هەیە، شەهیدبوو".
خالیدیان دەڵێت: "هێرشەکە لە رێگەی دوو مووشەکەوە بووە و جگە لە شەهیدبوونی پێشمەرگەیەکمان، سێ پێشمەرگەی دیکە بریندارن".
شەوی رابردوو، بەشی پەیوەندییە گشتییەکانی سوپای پاسدارانی کۆماری ئیسلامی ئێران رایگەیاند، "بە 30 فڕۆکەی بێ فڕۆکەوان، بنکە و بارەگای گرووپەکانی دژبەری کۆماری ئیسلامی ئێران لە هەرێمی کوردستانی عێراقمان پێکاوە."
سوپای پاسداران دەڵێ: "هێرشە هەواڵگرییەکە سەرکەوتووەکە لەکاتێکدا بووە، گرووپۆکە شەڕفرۆشەکانی دژبەری شۆڕش لە هەوڵی پلان داڕشتن بوون بۆ هاتنەناوەوە و هەوڵ دژی هەرێمی پیرۆزی نیشتمانی ئیسلامی."
راگەیێندراوەکەی سوپای پاسدارانی کۆماری ئیسلامی ئێران لەکاتێکدایە، بەرەبەیانی و پێشنیوەڕۆی دوێنێ سێشەممە بە درۆن هێرش کرایە سەر بنکەکانی حیزبی دیموکرات لە کۆیە.
تاریق حەیدەری، قایمقامی کۆیە بە رووداوی راگەیاندبوو، لە ئەنجامی هێرشەکەی سەر بنکەکانی حیزبی دیموکرات، ئێستا کەسێک بە سووکی بریندار بووە.
دوای هێرش بۆ سەر بارەگاکەیان لە دێگەڵە، پێشمەرگەیەکی پارتی ئازادیی کوردستان (پاک) دەڵێت: بە هاژەک و درۆن هێرشەکەیان کردووە pic.twitter.com/sC5mVealPZ
— Rudaw (@Rudawkurdish) March 4, 2026