رێڕەوی هاتووچۆ بۆ زیارەتکارانی چلەی ئیمام حوسێن لە پارێزگای ورمێ ئامادە دەکرێت

سەید موحسین حەمزەلو، بەڕێوەبەری گشتیی رێگەوبان و گەشەپێدانی شارەکانی پارێزگای ورمێ گوتی، "کارەکانی چاکسازی و ژێرخانی لە چوار کیلۆمەتری پیرانشار - سەردەشت بەڕێوەدەچێت و تاوەکو ئێستا زیاتر لە 400 ملیار تمەن، واتە 8 ملیۆن دۆلار، بۆ ئەم پڕۆژەیە خەرج کراوە."

حەمزەلو لە درێژەی قسەکانیدا ئاماژەی بەوە کرد، "میحوەری پیرانشار - سەردەشت بە درێژایی 93 کیلۆمەتر ئەگەری گەیشتن بە ترانزێت بۆ گومرگی تەمەرچین لە دیوی باشووری پارێزگاکەوە دابین دەکات."

بەڕێوەبەری گشتیی رێگەوبان و گەشەپێدانی شارەکانی پارێزگای ورمێ ئامانجی پەرەپێدانی ئەو رێگەیەی بۆ زیادکردنی توانای هاتووچۆ و ئاسانکاری بۆ گواستنەوەی بەرهەمەکان و خزمەتگوزاری و بەرهەمی کشتوکاڵی و رێکخستنی دەروازەی پیرانشار لە دیوی سەردەشتەوە گەڕاندەوە.

ئەم پڕۆژەیە 7.5 کیلۆمەترە و لە دوو ساڵی داهاتوودا تەواو دەبێت. ئەوەش لە کاتێکدایە کە ساڵی پار زیاتر لە 30 هەزار زیارەتکاری رۆژهەڵاتی کوردستان و ئێران لە رێگەی دەروازە سنوورییەکانی حاجی ئۆمەران و باشماخەوە بۆ رێورەسمی چلەی ماتەمینیی ئیمام حوسین چوونە کەربەلا.

رێوڕەسمی ئیمام حوسێن هەموو ساڵێک لە 20ی مانگی سەفەر/کۆچی لە عێراق و چەند وڵاتێکی دیکە بەڕێوەدەچێت. سەتان هەزار لە پەیڕەوانی شیعە سەردانی مەزارگەی ئیمام حوسێن لە کەربەلا دەکەن و بە چەندین شێواز ماتەم دەگێڕن.