رووداو دیجیتاڵ
ئێسک و پروسکی سەتان مرۆڤ لە پارێزگای مێردینی باکووری کوردستان دۆزرانەوە، کە گومان دەکرێت لە بیستەکانی سەدەی رابردوو کۆمەڵکوژ کرابن.
بەگوێرەی میدیا خۆجێییەکان، ئێسک و پروسک لە گوندی ئاربۆی سەر بە شارۆچکەی نوسێبین لە کەنیسەی مۆر دیمەت دۆزراونەتەوە، کە زۆرینەی دانیشتووانەکەی ئاشوورین.
تاوەکو ئێستا نازانرێت ئێسک و پروسکەکان بۆ کام سەردەم دەگەرێنەوە، بەڵام خەڵکی ناوچەکە کۆمەڵکوژیی سایفۆی ئاشوورییەکانیان لەبیرە کە لەنێوان ساڵانی 1914 بۆ 1924 لە ناوچەکە روویداوە.
بە گوێرەی ئەو وێنانەی بڵاوکراونەتەوە، ئێسک و پروسکی سەتان مرۆڤ لە ژوورێکی چوار بە پێنج مەتر، کە پێدەچێت پەناگە بوونێت، دۆزراونەتەوە.
مەزەندە دەکرێت ئەوانەی لە دەست بکەرانی کۆمەڵکوژییەکە هەڵاتوون، پەنایان بۆ ئەو شوێنە بردووە و لەوێ خۆیان حەشاردراوە، بەڵام هەر لەوێ کۆمەڵکوژ کراون.
گوندی ئاربۆ پێش کۆمەڵکوژیی سایفۆ 900 ماڵ بوو، بەڵام دوای ئەو کۆمەڵکوژییە گوندەکە چۆڵکرا و دانیشتووانەکەی دەربەدەر کران.
دوایینجار گوندی ئاربۆ لە ساڵانی نەوەدەکاندا بۆ سێیەم جار بە هۆکاری "ئەمنی" چۆڵکرا.
گوندەکە تاوەکو ساڵی 2001 بە چۆڵی مایەوە، ئاشوورییەکان کە کۆچیان کرد بۆ وڵاتانی ئەوروپا لە دوای ساڵی 2001 دەستیان کرد بە ئاوەدانکردنەوەی گوندەکە و لە ماوەی ساڵانی رابردوودا نزیکەی 20 خانوو دروستکران.