رووداو دیجیتاڵ
بەگوێرەی سەرچاوەیەکی ئەمنی بۆ رووداو، ئێوارەی ئەمڕۆ، حەوت هێرشی درۆنی و مووشەکی کرانە سەر سنووری پارێزگای هەولێر و قەزای کۆیە.
رۆژی دووشەممە، سەرچاوەیەکی ئەمنی لە هەولێر بە رووداوی راگەیاند، لە نێوان کاژێر 03:00 بۆ 05:00ی پاشنیوەڕۆ حەوت جار هێرش کراوە و پێنج لە هێرشەکان بۆ سەر شاری هەولێر بوون و دووانیان ئاراستەی قەزای کۆیە کراون.
سەرچاوەکە ئاماژەی بەوەش کرد، ئەو پێنج درۆن و مووشەکەی ئاراستەی هەولێر کرابوون، لە ئاسماندا تێکشکێندراون و هیچ زیانێکیان لێنەکەوتووەتەوە.
ئەم هێرشانە لە کاتێکدان کە لە 24 کاژێری رابردوودا، هەرێمی کوردستان بە 21 درۆن هێرشی کراوەتە سەر، کە 17یان بۆ سەر هەولێر و کۆیە و چوارەکەی دیکە بۆ سەر سلێمانی بوون.
بەگوێرەی بەدواداچوونی تۆڕی میدیایی رووداو، لە دەستپێکی جەنگی ئەمریکا و ئیسرائیل لەگەڵ ئێران لە 28ی شوباتەوە بەم هێرشانەی ئێوارەی ئەمڕۆشەوە، هەرێمی کوردستان بە 678 درۆن و مووشەک هێرشی کراوەتە سەری، کە زۆرینەیان (540 هێرش) بۆ سەر پارێزگای هەولێر بووە.
لە ئەنجامی ئەو هێرشانەدا، تاوەکو ئێستا 14 کەس گیانیان لەدەستداوە و 93 کەسی دیکەش بریندار بوون، قوربانییەکان پێکهاتوون لە هێزەکانی پێشمەرگە، ئاسایش، پێشمەرگەی حیزبەکانی رۆژهەڵاتی کوردستان، سەربازێکی فەرەنسی و ژمارەیەک هاونیشتمانیی سڤیل.
بەپێی دابەشبوونی جوگرافیی هێرشەکان، پارێزگای هەولێر بە 540 هێرش لە پلەی یەکەم، سلێمانی 111 هێرش، دهۆک 25 هێرش و پارێزگای هەڵەبجەش دوو هێرشی کراوەتە سەر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ