رووداو دیجیتاڵ
کەشناسیی هەرێمی کوردستان دەڵێت، ئەمڕۆش باران و بەفر لە ناوچە جیاوازەکان دەبارێت. کەشناسێکیش ئاماژە بەوە دەکات، ئەو بایەی ناوچەکەی گرتووەتەوە، سبەی کۆتایی دێت.
لەبارەی کەشوهەوای ئەمڕۆ شەممە، کەشناسیی هەرێمی کوردستان بڵاویکردەوە: "نمەباران لە ناوچە جیاكان دەبارێت و هەندێک کاتیش بارانی مامناوەند دەبارێت، بەتایبەت لە بەشی باشووری هەرێمی کوردستان، ئیدارەی گەرمیان و بەشێك لە پارێزگای سلێمانی".
کەشناسی دەڵێت، هەر ئەمڕۆ "لە ناوچە شاخاوییەكان بەفر دەبارێت و پێشبینی دەکرێت لە پارێزگای سلێمانی و هەندێك لە قەزا و ناحییەكانی رۆژهەڵاتی هەرێمی کوردستانیش بەفر ببارێ".
لەبارەی خێرایی با کە لە دوێنێوە چالاکە، محەممەد کەمال، شارەزای کەشناسی ئەمڕۆ شەممە بە رووداوی گوت: "ئێستا خێرایی با 28 کیلۆمەترە لە کاژێرێکدا. ئەم دۆخە تاوەکو سبەی یەکشەممە بەردەوام دەبێت".
ئەو کەشناسە گوتیشی، ئەم شەپۆلی بارانبارینە درەنگانی ئەمشەو لە هەرێمی کوردستان کۆتایی دێت و سبەی دۆخەکە ئاسایی دەبێتەوە.
هەر بەگوێرەی کەشناسیی هەرێمی کوردستان، ئەمڕۆ بەراورد بە دوێنێ پلەی گەرما نزیکەی سێ پلەی دادەبەزێت و سبەی ئاسمان نیمچە هەور دەبێت.
کەشناسیی هەرێمی کوردستان ئاماژەی بەوەشکردووە، سبەی بەرزترین پلەی گەرما لە باشووری کوردستان بەمشێوەیە دەبێت:
هەولێر؛ 11 پلەی سیلیزی
سلێمانی؛ 7پلەی سیلیزی
دهۆک؛ 10 پلەی سیلیزی
کەرکووک؛ 11 پلەی سیلیزی
زاخۆ؛ 10 پلەی سیلیزی
هەڵەبجە؛ 8 پلەی سیلیزی
حاجی ئۆمەران؛ -1 پلەی سیلیزی
سۆران؛ 8 پلەی سیلیزی
گەرمیان؛ 13 پلەی سیلیزی