پارتی: رێز لە بژاردە و ئیرادەی گەلانی سووریا دەگرین

پارتی دەڵێت، "هیوادارین قۆناخی داهاتوو، قۆناخی خۆشی و ئارامی و کۆتاییهاتنی ئاڵۆزییەکان و، سەرەتایەکی نوێ بێت لە پێکەوەژیان و یەکترقبووڵکردنی گشت پێکهاتەکانی ئەو وڵاتە، هەروەها ژینگەیەکی لەبار و دەرفەتی گونجاوی سەردەمیانە بڕەخسێت بۆ ژیانێکی شایستە بە گەلانی سووریا لە هەموو روویەکەوە".

بەرەبەیانی ئەمڕۆ یەکشەممە، 08-12-2024، چەکدارانی ئۆپۆزیسیۆنی سووریا چوونە نێو دیمەشقی پایتەختی سووریا و کۆنترۆڵیان کرد. بەمەش کۆتایی بە دەسەڵاتی 24 ساڵەی بەشار ئەسەد هات.

سەرۆکی دەستەی تەحریر شام دوای کۆنترۆڵکردنی دیمەشق، چووە نێو مزگەوتی ئومەوی و لەبەردەم هەزاران کەس رایگەیاند، "ئەسەد سووریای کردە گۆڕەپانی تەماعکاری ئێران". گوتیشی، "سەرکەوتنی ئەمڕۆ مێژوویەکی نوێیە بۆ ئوممەی ئیسلامی".

لە بەشێکی راگەیێندراوەکەی پارتی دا هاتووە: "هیوادارین ئەم گۆڕانکارییە کاریگەریی ئەرێنی لە پەیوەندییەکانی دەرەوەی سووریا و رەنگدانەوەی باشی هەبێ لە چارەسەری کێشە و گرفت و پەرەسەندنەکانی ئەم چەند ساڵەی دوایی لە سەرتاسەری ناوچەکە و، زمانی دیالۆگ ببێتە بنەمای سەرەکی بۆ چارەسەری گشت کێشەکان و رێز لە ئیرادە و خواستی گەلان بگیرێ".