رووداو دیجیتاڵ
سەرۆکی حکومەتی هەرێمی کوردستان رایگەیاند، بەهۆی دروستبوونی لافاو لە سنووری قەزای چەمچەماڵ دوو هاونیشتمانی گیانیان لەدەستداوە و لایەنە پەیوەندیدارەکانیشی راسپاردووە بە هانای لێقەوماوانەوە بچن.
رۆژی سێشەممە، 9-12-2025، مەسرور بارزانی، سەرۆکی حکومەتی هەرێمی کوردستان پەیامێکی لەبارەی زیانەکانی لافاو لە سنووری قەزای چەمچەماڵ بڵاوکردەوە.
مەسرور بارزانی لە پەیامەکەیدا دەڵێت: "بە داخەوە بە هۆی لافاوەوە، دوو هاووڵاتی لە شارەدێی شۆڕش سەر بە قەزای چەمچەماڵ گیانیان لە دەستداوە".
بە گوێرەی پەیامەکەی سەرۆکی حکومەت، لافاوەکە جگە لە زیانی گیانی، زیانی ماددیشی لێکەوتووەتەوە و "زیان بەر ماڵی هاووڵاتییان و قوتابخانە و فەرمانگەکانی حکومەت کەوتووە".
سەرۆکی حکومەتی هەرێمی کوردستان پرسە و سەرەخۆشی ئاراستەی کەسوکاری قوربانییان دەکات و دەڵێت: "هاوبەشی خەمیانم"، هەروەها هیوای چاکبوونەوەی خێرا بۆ برینداران دەخوازێت.
سەبارەت بە هەنگاوەکانی حکومەت بۆ رووبەڕووبوونەوەی دۆخەکە و یارمەتیدانی زیانلێکەوتووان، مەسرور بارزانی رایگەیاندووە: "وەزارەتە پەیوەندیدارەکان و ئیدارەی خۆجێییم راسپاردووە کە بە هانای لێقەوماوانەوە بچن و هەر هاوکاری و یارمەتییەک پێویست بێت، پێشکێشیان بکەن".
دەقی راگەیێندراوەکە:
پەیامێک لە سەرۆکی حکومەتی هەرێمی کوردستانەوە
بە داخەوە بە هۆی لافاوەوە، دوو هاووڵاتی لە شارەدێی شۆڕش سەر بە قەزای چەمچەماڵ گیانیان لە دەستداوە و زیانی ماددیش بەر ماڵی هاووڵاتییان و قوتابخانە و فەرمانگەکانی حکومەت کەوتووە.
پرسە و سەرەخۆشیی قووڵی خۆم ئاراستەی کەسوکاری قوربانیان دەکەم و هاوبەشی خەمیانم ، هیوای چاکبوونەوەی خێراش بۆ برینداران دەخوازم.
وەزارەتە پەیوەندیدارەکان و ئیدارەی خۆجێییم ڕاسپاردووە کە بە هانای لێقەوماوانەوە بچن و هەر هاوکاری و یارمەتییەک پێویست بێت، پێشکەشیان بکەن.
مەسرور بارزانی
سەرۆکی حکومەتی هەرێمی کوردستان
2025/12/9
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ