رووداو دیجیتاڵ
بەڕێوەبەری گشتیی گومرگی ھەرێمی کوردستان دەڵێت، لەسەرەتای ئەم مانگەوە هاوردەکردنی ئۆتۆمبێلی مۆدێل 2021 لە دەروازە سنوورییەکانی هەرێمی کوردستانەوە راگیراوە.
رۆژی هەینی، 10-11-2023، ساماڵ عەبدولڕەحمان، بەڕێوەبەری گشتیی گومرگی ھەرێمی کوردستان بە تۆڕی میدیایی رووداوی راگەیاند، "بەپێی رێنماییەکانی وەزارەتی ناوخۆ و گومرگەکان، لە سەرەتای مانگی تشرینی دووەمی هەموو ساڵێکدا هاوردەکردنی ئۆتۆمبێلێکی مۆدێلی ساڵانی پێشوو رادەگیرێت و مۆدێلێکی دیکەی بەرزتر زیاد دەکرێت. ئەمە چەند ساڵێکە جێبەجێ دەکرێت. لە سەرەتای ئەم مانگەشەوە هاوردەکردنی ئۆتۆمبێلی مۆدیل ساڵی 2021 لە گومرگەکانەوە راگیراوە و تەنیا ئۆتۆمبێلی مۆدێل ساڵانی 2022، 2023 و 2024 رێگەپێدراوە هاوردە بکرێت".
ساماڵ عەبدولڕەحمان ئاماژەی بۆ ئەوەشکرد، ئەو رێنماییە لە سەرتاسەری عێراق جێبەجێ دەکرێت و لەسەرەتای ئەم مانگەوە چووەتە بواری جێبەجێکردنەوە.
رۆژی 5-1-2023، وەزارەتی پلاندانانی عێراق ئاماری تایبەت بە ئۆتۆمبێلی لە عێراق راگەیاند و گوتی، لە کۆتایی ساڵی 2022دا حەوت ملیۆن و 460 هەزار ئۆتۆمبێلی تۆمارکراو لە عێراق و هەرێمی کوردستان هەبوون، لەکاتێکدا ژمارەی ئۆتۆمبێلی تۆمارکراو لە ساڵی 2021دا حەوت ملیۆن و 27 هەزار ئۆتۆمبێل بووە.
ئەوەی کە پەیوەندی بە هەرێمی کوردستانەوە هەیە، بەپێی ئامارەکانی بەڕێوەبەرایەتیی هاتووچۆی هەرێمی کوردستان، لە ساڵی 2022دا دوو ملیۆن و 71 هەزار و 626 ئۆتۆمبیل هەبوون.