رێبوار تەها، پارێزگاری کەرکووک.
رووداو دیجیتاڵ
پارێزگاری کەرکووک لە قوتابخانەی 11ی ئاداری کەرکووک دەنگی دا و داوای لە هاونیشتمانی و هاووڵاتییان کرد بچنە سەر سندووقەکانی دەنگدان و دەنگی خۆیان بدەن؛ ئاماژەی بەوەشکرد، "تاوانبارانی رووداوەکەی شەوی رابردوو دەستگیرکراون".
رێبوار تەها، پارێزگاری کەرکووک، لە لێدوانێکی رۆژنامەوانیدا رایگەیاند: "دڵخۆشم ئەمڕۆ دەنگدانی گشتی دەستیپێکرد. تاوەکو ئەم کاتە هیچ کێشە و گرفتێک رووی نەداوە. هیچ هۆکارێک نییە بۆ ئەوەی کێشە دروست بێت."
پارێزگاری کەرکووک داوای لە هاونیشتمانی و هاووڵاتییان کرد بەشداری ئەم هەڵبژاردنە بکەن و گوتی، "دەنگدان مافی خۆتانە؛ نوێنەری خۆتان هەڵبژێرن."
رێبوار تەها ئاماژەی بەوە دا، "داوا لە کۆمەڵانی خەڵک و کەرکووکییەکان دەکەم، دەنگ بدەن و کەرکووک و ئیدارەکەی بپارێزن."
پارێزگاری کەرکووک داوای لە هاونیشتمانی و هاووڵاتییانیش کرد ئاستەنگ و قەرەباڵخی لە شەقامەکان دروست نەکەن تاوەکو خەڵکی بە ئاسانی بگەنە بنکەکانی دەنگدان.
پارێزگاری کەرکووک لەبارەی رووداوەکەی شەوی رابردووش گوتی: "ئەو رووداوەی درەنگی شەوی رابردوو روویدا کە تێیدا پاسەوانی بەربژێرێکی بەرەیەکی سیاسی تەقەیەکی کرد و دوو پۆلیس کوژران، دوابەدوای رووداوەکە تاوانباران دەستگیرکران. ڤیدیۆ و وێنەکانمان بەدەستگەیشتووە و هەموو شتێک بە روونی دیارە. تاوانباران دەدەرێنە دادگە."
درەنگی شەوی رابردوو لە شاری کەرکووک شەڕەتەقە روویدا و بەهۆیەوە دوو پۆلیس کوژران و دوو هاونیشتمانیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ