رووداو دیجیتاڵ
لە هەردوو پارێزگای ئامەد و مەرەش لە باکووری کوردستان لە ئەنجامی دوو رووداوی هاتووچۆدا هەشت کەس گیانیان لەدەستدا و 38 کەسی دیکەش بریندار بوون.
رووداوی یەکەم ئێوارەی ئەمڕۆ پێنجشەممە 13ـی شوباتی 2025 لەسەر رێگەی سەرەکیی شارۆچکەی پازارجیخ لە پارێزگای مەرەش روویدا. لە رووداوەکەدا دوو ئۆتۆمبێل رووبەڕوو خۆیان بەیەکدی کێشا. لە ئەنجامدا چوار کەس دەستبەجێ گیانیان لەدەستدا و شەش کەسی دیکەش بریندار بوون.
بەڕێوەبەرایەتیی پۆلیسی مەرەش هۆکاری رووداوەکەی بۆ تیژڕەوی یەکێک لە ئۆتۆمبێلەکان گەڕاندەوە کە بەهۆیەوە شوفێرەکە کۆنترۆڵی لەدەستدا و چووە رێڕەوی بەرامبەر و بەخێرایی خۆی بە ئۆتۆمبێلی دووەم کێشا.
رووداوی دووەم، ئەمشەو روویدا. پاسێکی گەشتیاری لە مێردینی باکووری کوردستانەوە بەرەو پارێزگای ترابزۆن-ی تورکیا بەڕێکەوتبوو. لە رێگەی سەرەکیی نێوان هەردوو پارێزگای ئامەد – چەولیگ لە سنووری پارێزگای ئامەد لە نزیک شارۆچکەی گەنج وەرگەڕا و کەوتە نێو دۆڵێک.
بەڕێوەبەرایەتیی پۆلیسی ئامەد لەبارەی رووداوەکە رایگەیاند، پاسەکە بەهۆی خلیسکانیی لەسەر بەفر، وەرگەڕا و کەوتە دۆڵێکی نزیکی سەر رێگا.
بەپێی زانیارییە سەرەتاییەکان، لە رووداوەکەدا چوار کەس گیانیان لەدەستدا، 32 سەرنشینی دیکەش برینداربوون. چوار لە بریندارەکان تەندروستییان ناجێگیرە.
بەپێی داتاکانی بەرێوەبەرایەتی گشتیی هاتووچۆ و ئاسایشی تورکیا پار لە سەرانسەری تورکیا و باکووری کوردستان 623 هەزار و 148 رووداوی هاتووچۆ روویانداوە، بەهۆیانەوە 2713 کەس گیانیان لەدەستداوە و 388 هەزار و 644 کەسیش بریندار بوون.