ژمارەیەک لە ئەندامانی کۆبوونەوەی حیزب و لایەنەکان
رووداو دیجیتاڵ
7 حیزب و لایەنی سیاسیی هەرێمی کوردستان بۆ دروستکردنی هاوپەیمانێتییەک کۆبوونەوە، بەڵام پێش لەدایکبوونی هاوپەیمانێتییەک، بەشێک لە حیزب و لایەنە بەشداربووەکان کشانەوە.
ئەو حیزب و لایەنانە ئامانجیان پێکهێنانی لیستێکی هاوبەش و هاوگوتارە بۆ بەشداریکردن لە هەڵبژاردنی پەرلەمانی عێراق، بەڵام هەر زوو رەوتی هەڵوێست بێبەریبوونی خۆی لێ راگەیاند.
رێبوار كەریم، ئەندامی دەستەی بەڕێوەبردنی رەوتی هەڵوێست دەڵێت، "ئێمە کشاینەوە لەبەر ئەوەی پێمان وایە ئەوەی ئێمە دەمانەوێت تێیدا نیە و متمانەمان پێی نییە، بەتایبەت لە رێککەوتنی دوای هەڵبژاردن. بەتایبەت نەوەی نوێ لەوێ رێککەوتن دەکات لەسەر پۆست و لێرە قسەی دیکە، ئەوە بێ متمانەیی دروست دەکات."
هەڵوێستی رەوتی هەڵوێست لە کاتێکدایە، رۆژی یەکشەممە نوێنەرانی نەوەی نوێ، یەکگرتووی ئیسلامی، کۆمەڵی دادگەری، رەوتی هەڵوێست، بەرەی گەل، بزووتنەوەی پەیوەندیی ئیسلامیی کوردستان و چەند کەسایەتییەکی سەربەخۆ لە بارەگای رەوتی هەڵوێست لە سلێمانی کۆبوونەوە.
شوان رابەر، ئەندامی ئەنجوومەنی باڵای کۆمەڵی دادگەری رایگەیاند، "پێمان وایە ئەو 7 حیزب و لایەنە هاوپەیمانێتی دروستبکەن، هاوکێشەی هێز لە کوردستان دەگۆڕن."
بەپێی زانیارییەکانی تۆڕی میدیایی رووداو، جگە لە رەوتی هەڵوێست، 6 لایەنەکەی دیکە لە کۆبوونەوەی داهاتوویاندا هاوپەیمانێتییەکە تاوتوێ دەکەن، ئەگەر بۆ هەرێمی کوردستانیش رێکنەکەون، هەوڵدەدەن بۆ کەرکووک و ناوچە کوردستانییەکانی دیکە لیستێکی هاوبەشیان هەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ