رووداو دیجیتاڵ
جێگری سەرۆکی لیژنەی ئاسایش و بەرگری لە پەرلەمانی عێراق دەڵێت، راپۆرتی لیژنەکەیان سەبارەت بە هێرشەکەی سەر ماڵی پێشڕەو دزەیی لە هەولێر تەواو بووە و جەخت لەوە دەکەنەوە کە ماڵی هاووڵاتییەکی سڤیل کراوتە ئامانج.
15ـی مانگی رابردوو ئێران بە مووشەک ماڵی پێشڕەو دزەیی، سەرمایەداری کوردستانی کردە ئامانج و بەو هۆیەوە ئەو سەرمایەدارە و منداڵێکی و دوو کەسی دیکە گیانیان لەدەستدا.
شەش رۆژ دواتر لیژنەیەک لە لیژنەی ئاسایش و بەرگریی پەرلەمانی عێراق سەردانی شوێنی بۆردوومانەکەیان کرد و بڕیاریاندا راپۆرتی خۆیان لەبارەی هێرشەکە بنووسن.
سەگڤان سندی، جێگری سەرۆکی لیژنەی ئاسایش و بەرگری لە پەرلەمانی عێراق ئەمڕۆ چوارشەممە بە تۆڕی میدیایی رووداوی گوت، نووسینی راپۆرتەکە کۆتایی هاتووە و لەکاتێکی نزیکدا ئاراستەی سەرۆکایەتیی پەرلەمانی عێراقی دەکەن.
بۆ پاساوی هێرشەکەیان، ئێران بانگەشەی ئەوەی دەکرد، گوایە شوێنێکی دەزگای هەواڵگریی ئیسرائیلیان لە هەولێر کردووەتە ئامانج.
لەبارەی نێوەڕۆکی راپۆرتەکەیانەوە سەگڤان سندی گوتی، "جەختکراوەتەوە کە ئێران ماڵێکی سڤیلی کردووەتە ئامانج و ئەوانەشی بوونەتە قوربانی هەر سڤیلن".
هێرشەکە کە سوپای پاسدارانی ئێران لە ئەستۆی گرت، کاژێر 11:30ی خولەکی شەوی 15-01-2024، ئەنجامدرا.
لەو هێرشەدا 16 کەسی دیکە بریندار بوون، لەنێویاندا هاوژین و دوو کوڕی پێشڕەو دزیی هەبوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ