شارەوانیی کەلار: بەم نزیکانە گەڕەکی ئەندازیاران قیرتاو دەکرێت

مستەفا ئەحمەد، هاونیشتمانییەکی دانیشتووی گەڕەکی ئەندازیارانە لە کەلار، بە رادیۆی رووداوی گوت، "دوو ساڵە شارێکی نیشتەجێبوون لە تەنیشتی گەڕەکەکەمان دروست دەکرێت و چوار مانگ دەبێت، شەقامی نێوان پرۆژەکە و گەڕەکەکەی ئێمە تێکدراوە، تاوەکو ئێستا چاک نەکراوەتەوە و کۆمپانیاکە هەر ئەمڕۆ و سبەی دەکات، داواکارین چارەسەر بکرێت."

ئەکرەم ساڵح، سەرۆکی شارەوانیی کەلار، بە رادیۆی رووداوی گوت، "دانیشتووانی ئەو گەڕەکە سەردانیان کردووین و ئاگاداری کێشەکەیانین، بەم نزیکانە رێگەکە چاک دەکرێت و قیرتاو دەکرێت."

لەبارەی کێشەی ئەوەی بۆچی تاوەکو ئێستا ئەو رێگەیە تەواو نەکراوە، سەرۆکی شارەوانیی کەلار گوتی، بەشێکی زۆر لەو ماڵانە بە زێدەڕۆیی باخچەیان دروستکردووە و بەم نزیکانە رێگەکە تەواو دەکرێت.